ދެ އަންހެނަކަށް ޖިންސީ ގޯނާ ކުރި ކަމަށް ބުނާ އިންޑިއާ މީހާގެ މައްސަލަ އަނބުރާ ފޮނުވައިލައިފި
މާލޭ މަގުމަތީގައި ހިނގާފައި ދިޔަ ދެ އަންހެނަކަށް މިދިޔަ އަހަރުގެ ޑިސެމްބަރު މަހު، ޖިންސީ ގޯނާ ކުރި ކަމަށް ތުހުމަތު ކުރެވިގެން ހައްޔަރުކުރި އިންޑިއާ މީހާއަށް އެ މައްސަލާގައި ދައުވާ ކުރެވޭވަރަށް ހެކި ނެތްކަމަށް ބުނެ މައްސަލަ އަނބުރާ ފޮނުވައިލައިފިއެވެ.
މި މައްސަލައާ ގުޅިގެން ފުލުހުން ހައްޔަރުކުރީ އުމުރުން 34 އަހަރުގެ ފިރިހެނެކެވެ.
މަގު މަތިން ހިނގާފައި ދަނިކޮށް ޖިންސީ ގޯނާ ކުރިކަމަށް ބުނާ ދެ އަންހެނުންގެ ތެރެއިން އެކަކު ވަނީ އެ މައްސަލާގައި ފުލުހުން ނިންމި ގޮތުގެ ލިޔުން ޓްވިޓާގައި ހިއްސާކޮށްފައެވެ.
މިކަމާ ގުޅޭގޮތުން ފުލުހުން ވިދާޅުވީ މައްސަލަ ތަހުގީގު ކުރުމަށްފަހު ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވުމުން ހެކި ބަހަށް ފުރިހަމަ ބުރަދަނެއް ދެވެން ނެތުމާއި، ވީޑިއޯ ފުޓޭޖުން ފެންނަ މީހާގެ ސިފަތައް އަޅާ ކިޔޭވަރަށް ވުރެ ނުސާފުކަމުން ދައުވާ ކުރެވެން ނެތް ކަމަށެވެ. އަދި މައްސަލައިގައި އިތުރު ގަރީނާ ލިބިފައި ނުވާތީ، އެ މައްސަލާގައި ދައުވާކޮށް ކުށް ސާބިތުވާނެ ކަމަށް ނުފެންނާތީ ޕީޖީއިން މައްސަލަ އަނބުރާ ޕޮލިހަށް ފޮނުވާފައިވާ ކަމަށް ފުލުހުން ވަނީ ވިދާޅުވެފައެވެ.
މި މައްސަލައާ ގުޅޭގޮތުން އިތުރު މައުލޫމާތު ލިބުމުން މައްސަލަ އަލުން ކުރިއަށް ގެންދާ ގޮތަށް ނިންމާ މައްސަލަ ފައިލުކޮށްފައިވާ ކަމަށް ވެސް ފުލުހުން ވިދާޅުވިއެވެ.
