ރާއްޖެއަށް ގޮސް ތިޖަހާ ސަކަރާތް ކޮންމެހެން އެންމެންނަށް ދައްކާނެ ކަމެއް ނެތް: ނަވާޒުއްދީން
ބޮލީވުޑްގެ މަޝްހޫރު މީހުން ރާއްޖެ އައިސް، ނަގާ ފޮޓޯތައް ހިއްސާ ކުރާތީ އެކްޓަރ ނަވާޒުއްދީން ސިއްދީގީ ރުޅި ގަދަ ވެއްޖެއެވެ.
އިންޑިއާގައި މިހާރު ހަލުވި ކަމާއެކު ކޮވިޑް-19 ފެތުރި، ޤައުމު ބޮޑު ނުރައްކަލެއްގެ ތެރެއަށް ވެއްޓިފައިވާ ދަނޑިވަޅެއްގައި ބޮލީވުޑްގެ ގިނަ ތަރިން ރާއްޖެ އައިސް، އެމީހުންގެ ޗުއްޓީ ހޭދަ ކުރާ ގޮތްތަކުގެ ފޮޓޯތައް މީސް މީޑިއާގައި ހިއްސާ ކުރާތީ އެތައް ބަޔަކު އަންނަނީ އެކަމާ ނުރުހުން ފާޅު ކުރަމުންނެވެ.
އިންޑިއާގެ މަޝްހޫރު ތަރިން ކަމަށްވާ ޖާންވީ ކަޕޫރް، ދިޝާ ޕަޓާނީ، ޓައިގާ ޝްރޯފް، ޝްރައްދާ ކަޕޫރް ވެސް ވަނީ ރާއްޖެއަށް އައިސް ޗުއްޓީ ހޭދަ ކުރި ގޮތުގެ އުފާވެރި މަންޒަރުތައް ދައްކުވައިދޭ ފޮޓޯތަކެއް މީސް މީޑިއާގައި ހިއްސާ ކޮށްފައެވެ. އެ ތަރިން ބުނި ގޮތުގައި ރާއްޖެއަކީ ޗުއްޓީ ހޭދަ ކުރަން އެމީހުންނަށް އެންމެ ކަމުދާ މަންޒިލެވެ. އާލިއާ ބަޓް އާއި ރަންބީރް ކަޕޫރް ވެސް ވަނީ ދާދި ފަހުން ރާއްޖެ އައިސްފައެވެ. ނަމަވެސް އެމީހުން އެއްވެސް ފޮޓޯއެއް މީޑިއާގައި އަދި ހިއްސާ ކޮށްފައެއް ނުވެއެވެ.
މަޝްހޫރު ތަރިން ހިއްސާ ކުރި އެ ފޮޓޯތަކަށް ގިނަ ބަޔަކު ފާޑުކީ މީހުންގެ ތެރޭގައި ދާއިރާގެ ބައެއް މީހުން ވެސް ހިމެނެއެވެ. އޭގެ ތެރޭގައި ނަވާޒުއްދީން ވެސް ހިމެނެއެވެ. އެ ގޮތުން ތަރިން ޗުއްޓީ ހޭދަ ކުރަން ރާއްޖެއަށް އައިސް ޕޯސްޓު ކުރާ ފޮޓޯތަކާ މެދު ދެކެނީ ކިހިނެއްތޯ ސުވާލު ކުރުމުން އޭނާ ބުނީ، މިފަދަ ދަތި ދަނޑިވަޅެއްގައި އެގޮތަށް ފޮޓޯތައް ހިއްސާ ކުރަން ލަދު ގަންނަން ޖެހޭނެ ކަމަށެވެ.
"ގިނަ މީހުން އެ އުޅެނީ ކާނެފަދަ ވެސް ނުލިބިގެން. އެކަމަކު މުނިފޫހިފިލުވުމުގެ ދާއިރާގައި އުޅޭ މި ތަރިން ގޮސް ފައިސާތައް އިސްރާފުކޮށް، އެ މަންޒަރުތައް ވެސް މީހުންނަށް ދައްކަނީ. ލަދު ގަންނަން ޖެހޭނެ މިކަހަލަ ކަންތައް ކުރަން. ރާއްޖެއަށް ގޮސް ތި ޖަހާ ސަކަރާތް ކޮންމެހެން އެންމެންނަށް ދައްކާނެ ކަމެއް ނެތް" ވަރަށް ބޮޑަށް ނުރުހިފައި ހުރެ ނަވާޒުއްދީން ބުނެފައިވެއެވެ.
މީގެ އިތުރުން ނަވާޒުއްދީން ބުނީ ފޮޓޯތައް ހިއްސާ ކުރާ ތަރިން އެ ފަދައިން ކަންތައް އެކުރަނީ ކުރާނެ އިތުުރު ކަމެއް ވެސް ނެތުމާއެކު ދައްކާނެ އިތުރު ވާހަކައެއް ވެސް ނެތުމުން ކަމަށެވެ. ނަވާޒުއްދީން ބުނީ ރާއްޖެއަކީ ސަމާސާއެއްގެ ގޮތުގައި އެ އެކްޓަރުން ހަދައިފި ކަމަށާއި ރާއްޖޭގެ ފަތުރުވެރިކަމުގެ ދާއިރާއާ އެ ތަރިން ހަދާފައި އޮތީ ކޮން އެރޭންޖްމަންޓެއް ކަމެއް ނޭނގޭ ކަމަށެވެ.
