ރޮޒައިނާ ވިދާޅުވީ ޕީޕީއެމް މެންބަރުން އުޅެނީ "ޖޭ"ވެގެން ކަމަށް
ޕީޕީއެމް މެންބަރުން އުޅެނީ އެމްޑީޕީގެ ސަރުކާރާ "ޖޭވެގެން" ކަމަށް ބުނެ އައްޑޫ މީދޫ ދާއިރާގެ މަޖިލިސް މެމްބަރު ރޮޒައިނާ އާދަމް އިދިކޮޅު ފަރާތްތަކަށް ފާޑު ވިދާޅުވެއްޖެއެވެ.
އެމްއެމްއޭގެ ޕަބްލިކް އެކައުންޓުން އޯވަ ޑްރޯ ކުރުމުގެ ހުއްދަ ހޯދުމަށް ޓަކައި، ދައުލަތުގެ ޚަރަދަށް ޒިންމާވުމުގެ ގާނޫނުގެ ވަކި މާއްދާތަކަކަށް ޢަމަލުކުރުން ހުއްޓައިލައިފައި އޮތްއޮތުން އެއް އަހަރުގެ މުއްދަތަކަށް އިތުރުކުރުމަށް މަޖިލީހަށް ހުށަހެޅުނު މައްސަލައިގައި ބަހުސް ކުރައްވަމުން ރޮޒައިނާ ވިދާޅުވީ ކޮވިޑް-19 އެންމެ ދަތި އުދަނގޫ ދުވަސްތަކުގައި ވެސް ސަރުކާރުން ހުރިހާ ކަމެއް ވެސް ބަލަހައްޓާފައި ވަނީ ވަރަށް ރަނގަޅަށް ކަމަށެވެ. އަދި މި ހާލަތުގެ ތެރޭގައި ވެސް ތަރައްޤިގެ އެއްވެސް މަޝްރޫއެއް ހުއްޓުމެއް ނެތި މި ސަރުކާރުން ކުރިއަށް ގެންދިޔަ ކަމަށާއި، އަދި އެކަމާ އިދިކޮޅު ފަރާތްތަކުން "ޖޭ"ވާ ކަމަށް ރޮޒައިނާ ވިދާޅުވިއެވެ.
"އަޅުގަނޑުމެން މިދިޔައީ ތަރައްގީގެ މަޝްރޫއުތައް ވެސް ހަމަ ހުއްޓުމަކާ ނުލައި ކުރިއަށް ގެންދަމުން. އެހެންވީމާ ހަމަ ޖޭވަނީ،" އޭނާ ވިދާޅުވިއެވެ.
ރޮޒައިނާ އިތުރަށް ވިދާޅުވީ، މި ސަރުކާރުގެ ދެ އަހަރުދުވަހުގެ ތެރޭގައި ކޮށްފައި ވަނީ، މިހާރުގެ ޒުވާނުން ބުނާ ގޮތުން ނަމަ ޖޭ ވާވަރުގެ މަސައްކަތްްތަކެއް ކަމަށެވެ. އަދި ކޮވިޑް-19 އާ ހެދި ރާއްޖެއަށް ވާނެ ކަމަށް އިދިކޮޅުން ލަފާ ކުރެއްވި ގޮތް ނުވީމާ ވެސް ޖޭވާ ކަމަށް ރޮޒައިނާ ވިދާޅުވިއެވެ.
ރޮޒައިނާ މި މޭރުމުން ވާހަކަފުޅު ދައްކަވާފައި ވަނީ މިއަދުގެ ޖަލްސާގައި ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ދެއްކެވި ވާހަކައަށް ރައްދު ދެއްވަމުންނެވެ. މިގޮތުން ޝިޔާމް ވަނީ ރާއްޖޭގެ މާލިއްޔަތުގައި މިއަދު ފައިސާ ނެތް ކަަމަށާއި އޮތީ "ލައްޑޫ" އެކަނި ކަމަށް ވިދާޅުވެފައެވެ.
މމޕރސ އިން އެންމެ ގިނައިން ފައިސާލިބުނު އެކަކު ޗޮއްޕަޑު ރޮޒައިނާ