ކޮވިޑް-19 ޖެހިފައިތިބި 20 މީހަކު ހޮސްޕިޓަލަކުން ފިލައިފި
އިންޑިއާ: މަހަރަޝްތްރާގެ ހޮސްޕިޓަލެއްގައި ކޮވިޑަށް ފަރުވާ ހޯދަމުން ދިޔަ 20 މީހަކު ހޮސްޕިޓަލުން ފިލައިފިއެވެ.
ރިޕޯޓްތައް ބުނާ ގޮތުގައި މި 20 މީހުން ފައްސިވެފައި ވަނީ އަމްޑީ ވިލެޖް ސަރަހައްދުގައި އޭޕްރިން 23 ވަނަ ދުވަހު ކޮވިޑަށް ޓެސްޓު ކުރުމަށް ނެގުނު ސާމްޕަލްތަކުންނެވެ. ފައްސި ވުމާއެކު އެމީހުން އިތުރު ފަރުވާއަށް ހޮސްޕިޓަލުގައި އެޑްމިޓް ކުރެވުނު ކަމަށް އޮފިޝަލުން ބުނެއެވެ.
ހޮސްޕިޓަލާ ހަވާލާދީ ނޫސްތަކުން ބުނެފައި ވަނީ ކޮވިޑްގެ ނުރައްކާތެރި ރާޅެއް އިންޑިއާއަށް އަރައި އެގައުމު ހާސްކޮށްލައިފައިވާ މި ދަނޑިވަޅުގައި ކޮވިޑްގެ ބަލި މީހުން ފިލުމަކީ ބަލި އިތުރަށް ފެތުރޭން އޮތް މަގެއް ކަމަށާއި އެމީހުންނާ މެދު ހަރުކަށި ފިޔަވަޅު އެޅުމަށް ވެސް ހޮސްޕިޓަލުން އެދިފައިވާ ކަމަށެވެ.
ފާއިތުވަމުން މިދާ ދުވަސްތަކުގައި އިންޑިއާއިން ރެކޯޑް އަދަދަކަށް ފައްސި ކޭސްތައް އިތުރުވަމުން އެބަދެއެވެ. ތަފާސް ހިސާބުތަކަށް ބަލާއިރު އިންޑިއާއިން ކޮވިޑަށް ފައްސިވި މީހުންގެ އަދަދު ވަނީ 17،313،163 އަށް އަރާފައެެވެ. އަދި ބަލީގައި މަރުވި މީހުންގެ އަދަދަކީ 195،123 އެވެ.
Ads by STO
