އުންމީދަކީ 700،000 ޑޯސް ވެކްސިން ޖޫންގައި ލިބެން ފެށުން : ހެލްތް މިނިސްޓަރު
ދިވެހިރާއްޖެއަށް ގެންނަ އެސްޓްރާޒެނެކާ ކޮވިޑް ވެކްސިނުގެ 700،000 ޑޯސް ވެކްސިން ޖޫން މަސްތެރޭގައި ލިބެން ފަށާނެ ކަމަށް އުންމީދު ކުރައްވާ ކަމަށް ހެލްތު މިނިސްޓަރު އަޙްމަދު ނަސީމު ވިދާޅުވެއްޖެއެވެ.
މިނިސްޓަރު ވިދާޅުވީ ޖޫން މަހުގެ ތެރޭގައި އެސްޓްރާޒެނެކާއިން ހޯދުމަށް އެއްބަސްވެފައިވާ ވެކްސިނުގެ ޑޯސްތައް ލިބެން ފަށާނެ ކަމުގައި އުންމީދު ކުރެއްވި ނަމަވެސް ކަނޑައެޅިގެން ވަކި ތާރީޚެއްގައި ވެކްސިން ލިބޭނެ ކަމަށް ދެންނެވޭނީ ކޮންފާމޭޝަން ލިބުމުން ކަމަށެވެ.
މީގެ އިތުރުން މިނިސްޓަރ ވިދާޅުވީ ވެކްސިންގެ މައުލޫމާތު ލިބެމުންދާ ވަރަކަށް ހިއްސާކުރަމުން ގެންދަވާނެ ކަމަށެވެ.
ކޮވިޑުން ރައްކާތެރިވުމަށް ރާއްޖޭގައި މިހާރު ދެމުން ގެންދަނީ ތިން ވައްތަރެއްގެ ވެކްސިނެކެވެ. އެއީ އިންޑިއާއިން ހަދިޔާކުރި އަސްޓްރާޒެނެކާ ކޮވިޝީލްޑް ވެކްސިނާއި ޗައިނާއިން ހަދިޔާ ކޮށްފައިވާ ސިނޮފާމް ވެކްސިންގެ އިތުރުން ބަޔޮއެންޓެކް ފައިޒާ ވެކްސިނެވެ.
މީގެތެރެއިން ކޮވިޝީލްޑް ވެކްސިންގެ ފުރަތަމަ ޑޯޒް ދިނުން ނިންމައި މިހާރު ދެނީ ދެވަނަ ޑޯޒެވެ. ސިނޮފާމްގެ މިހާރު ދެނީ ފުރަތަމަ ޑޯޒާއި ދެވަނަ ޑޯޒެވެ. އަދި ފައިޒާ ވެކްސިން ދެނީ ރިސްކް ހައި މީހުން ފަދަ ޚާއްޞަ ފަރާތްތަކަކަށް އެކަންޏެވެ.
