އެކްސިޑެންޓުވެ ފައިބުރި ކޮށްލަން ޖެހުނު ނަމަވެސް ހިތްވަރު އެލުވައެއް ނުލާ، މިއަދު ޕެރަލިމްޕިކް ޗެމްޕިއަނެއް!
2011 ވަނަ އަހަރުގެ އޭޕްރީލް މަހުގެ ދެވަނަ ދުވަހަކީ އިންޑިއާގެ ރައްޔިތުންނަށް ޚާއްސަ ދުވަހެކެވެ. އެ ދުވަހު އެންމެން ވެސް އަވަދިނެތި އުޅުނީ އެއް ކަމެއްގައެވެ. ކްރިކެޓް ވޯލްޑް ކަޕްގެ ފައިނަލް މެޗުގައި އިންޑިއާ ކުޅޭ މެޗު ބެލުމަށެވެ. ސަބަބެއް ނެތިއެއް ނޫނެވެ. އެއީ 28 އަހަރަށް ފަހު އިންޑިއާއިން ވޯލްޑް ކަޕެއް ކާމިޔާބު ކުރަން އޮތް ފުރުސަތު ކަމަށް ވުމުންނެވެ.
އެންމެން މެޗު ބަލާ އުފާފާޅު ކުރުމުގައި އުޅުނު ނަމަވެސް އެ ދުވަހަކީ މާނިޝް ޕާންޑޭއަށް ހިތި ދުވަހެކެވެ. އޭނާގެ ހަޔާތް ބަނަކޮށްލި ވިލާގަނޑު އޭނާގެ ދިރިއުޅުމަށް ކަޅު ކޮށްލި ދުވަހަކީ އެއީއެވެ. އޭރު 19 އަހަރުގެ މާނޭޝް އުޅުނީ އަވަސް އަރުވާލައިގެން މެޗު ބަލަން ގެއަށް ދާށެވެ.
އޭނާ އެދުވަހު ރައިޕޫރު ސްޓޭޝަންގެ ރޭލަށް އަރަން ދިޔައިރު މުޅި ރޭލު އޮތީ ފުރި ބަރާވެފައެވެ. އެއީ އާދައިގެ މަތިން ވެސް ހާލަތެވެ. ނަމަވެސް އެ ދުވަހު މީހުން އުޅެނީ އެހެން ދުވަސްދުވަހަށް ވުރެ އަވަސް އަރުވާލައިގެންނެވެ. އެހެން ދުވަސްދުވަހަށް ވުރެ ލައި ނުގަނެގެންނެވެ. އޭނާއެކޭ އެއްފަދައިން ވޯލްޑް ކަޕް ފައިނަލް މެޗު ބަލަން ދިއުމަށެވެ.
އެގޮތުގައި އުޅެނިކޮށް ރޭލު ނައްޓާލިތަނާ މީހަކު އޭނާ ކޮއްޕާލިއެވެ. އަދި އޭނާ ދުއްވަމުން ދިޔަ ރޭލުން ވެއްޓި އޭނާގެ ފައި ރޭލު ދަށުވިއެވެ. އަދި އޭނާގެ ފައި ވަރަށް ބޮޑަށް ޒަހަމް ވިއެވެ.
އޭނާ ދިރިއުޅޭ ސަރަހައްދަކީ ސިއްހީ ގޮތުން މާ ކުރިއަރާފައިވާ ތަނަކަށް ނުވާތީ އޭނާގެ ފައި ސާޖަރީ ކުރެވޭ ގޮތެއް ނުވިއެވެ. ނަތީޖާއެއްގެ ގޮތުން އޭނާގެ ފައި ޖެހުނީ ބުރި ކޮށްލާށެވެ. އެހެންކަމުން ކަކުލު ހުޅުން އޭނާގެ ފައި ބުރިކޮށްލެވުނެވެ.
އެދުވަހުގެ އެކްސިޑެންޓަށް ފަހު ވެސް އޭނާއަށް އަރާފައިހުރި މެޗުގެ ފޯރި ނުގެއްލެއެވެ. އެކްސިޑެންޓުވެގެން އޭނާ ހޭނެތުނު ނަމަވެސް ހޭ އެރުމާއެކު އޭނާ ޑޮކްޓަރު ގާތުގައި ކުރި ސުވާލަކީ މެޗުން އިންޑިއާ މޮޅުވިތޯއެވެ. އަދި ޑޮކްޓަރ އާނއެކޭ ބުނުމުން އޭނާ ދެރަވީ އެ މަންޒަރުތައް އޭނާއަށް ނުފެނުމުން ކަމަށް އޭނާ ކިޔައިދިނެވެ.
އެކްސިޑެންޓުގައި ފައި ބުރިކޮށްލަން ޖެހުނު ނަމަވެސް މާނޭޝްގެ ހިތްވަރަކަށް ބަދަލެއް ނާދެއެވެ.
މިއަދު އޭނާއަކީ ޕެރަލިމްޕިކް ޗެމްޕިއަނެކެވެ. އެއްފައި ޖަހައިގެން ދުވާ މާނޭޝް ވަނީ އެތައް މެޑައްޔެއް އޭޝިއަން ގޭމްސްގައި ހާސިލު ކޮށްފައެވެ. މިއަދު އޭނާއަށް ޓަކައި މުޅި އިންޑިއާ ފަހުރުވެރިވެއެވެ. އެއީ ހިތްވަރު ދޫކޮށްނުލާ މަސައްކަތް ކުރުމުގެ ނަތީޖާއެވެ.
Ads by STO
