ކޮވިޑަށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެ
ކޮވިޑް-19އަށް ފަރުވާ ހޯދަމުންދިޔަ އިތުރު މީހަކު ރާއްޖެއިން މިއަދު ނިޔާވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މައުލޫމާތު ދީފައިވާ ގޮތުގައި ނިޔާވެފައި ވަނީ ޅ. ނައިފަރު ގައި ހުންނަ އެ އަތޮޅު ހޮސްޕިޓަލުގައި ފަރުވާ ދެމުން ދިޔަ އުމުރުން 83 އަހަރުގެ ދިވެހި ފިރިހެނެކެވެ.
އެ މީހާ ނިޔާވީ މިއަދު މެންދުރު 12:30ގައި ކަމަށް އެޗްޕީއޭއިން ބުނެފައިވެއެވެ. މިއީ ރާއްޖެއިން މި ބަލީގައި ނިޔާވި 76 ވަނަ މީހާއެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި، ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
މިއީ 24 ގަޑިއިރު ތެރޭގައި ރާއްޖެއިން ކޮވިޑް ޖެހިގެން މިއަދު ނިޔާވި ދެވަނަ މީހާއެވެ. ރޭ މެންދަމު 3:18 ގައި އުމުރުން 77 އަހަރުގެ އަންހެނަކު ވެސް ވަނީ މި ބަލީގައި ނިޔާވެފައެވެ.
ރާއްޖޭގައި މިދުވަސްވަރު އަނެއްކާ ވެސް ކޮވިޑަށް ފައްސިވާ މީހުންގެ އަދަދުތައް އަންނަނީ ރިކޯޑު އަދަދަކަށް އިތުރުވަމުންނެވެ. އެގޮތުން އިއްޔެ ވެސް 734 މީހުން މި ބައްޔަށް ރާއްޖެއިން ފައްސި ވެފައިވާއިރު ޖުމްލަ އަދަދު މިހާރު ވަނީ 32،665 އަށް އަރާފައެވެ.
ކޮވިޑް-19 ފެތުރުން ކޮންޓްރޯލު ކުރުމަށް ސަރުކާރުން ވަނީ އަނެއްކާ ވެސް ފިޔަވަޅުތަކެއް އިތުރު ކޮށްފައެވެ. އެގޮތުން މާލެ ސަރަޙައްދު (މާލެ، ވިލިމާލެ، ހުޅުމާލެ، ތިލަފަޅު، ގުޅީފަޅު) ގައި ރޭގަނޑު 9:00 އިން ފެށިގެން ފަތިހު 4:00 އަށް ބޭރުގައި އުޅުން މަނަލެވެ. އަދި މެންދަމު 00:00 އިން ފަތިހު 4:00 އަށް އެއްގަމު އުޅަނދުފަހަރު ދުއްވުން ވެސް މަނަލެވެ.
