އުޒުރަކާ ނުލައި، ފިޠުރު ޒަކާތް ދެއްކުން ޢީދު ދުވަހަށް ވުރެ ލަސްކުރުމަކީ ފާފަވެރިވާނެ ކަމެއް: ޚުތުބާ
މިއަދުގެ ހުކުރު ޚުތުބާ ޚާއްސަ ކޮށްފައި ވަނީ ރަމަޟާން މަހުގެ ރޯދައާއި ފިޠުރު ޒަކާތާ ގުޅޭގޮތުންނެވެ.
އިއްޔެ އެންމެހާ މުސްލިމުން ރަމަޟާން މަހަށް އިސްތިޤުބާލު ކިޔާފައިވާކަމަށާއި މިއަދު މުސްލިމުން މިވަނީ އެ މަހަށް އަލްވަދާއު ކިޔަން ތައްޔާރުވެފައިކަން މިއަދުގެ ޚުތުބާގައި ވަނީ ފާހަގަ ކުރައްވާފައެވެ. އަދި ކާމިޔާބު ލިބިގެންވާ މީހަކީ ﷲ އަށް ކިޔަމަން ގަތުމުގައި އެމީހެއްގެ ވަގުތު ހޭދަކުރި މީހާކަން ވެސް ޚުތުބާގައި ފާހަގަ ކުރައްވާފައިވެއެވެ.
ރަމަޟާން މަހު އަހަރެމެން ހިފި ރޯދަ ފުރިހަމަ ކޮށްދެއްވުމަށް ޓަކައި އަޅަމެންގެ މައްޗަށް ފިޠުރު ޒަކާތް ވަނީ ޝަރްޢު ކުރައްވާފައެވެ. ރަސޫލާ (ޞޢވ) ޙަދީޘް ކުރެއްވި ބަސްފުޅެއްގައި މާނައިގައިވެއެވެ.
"ފިޠުރު ޒަކާތް ނެރުމަކީ ބޭކާރު ޢަމަލުތަކުންނާއި، ހަޑިހުތުރު ބަސްތަކުން ރޯދަވެރިޔާ ޠާހިރުކޮށްދޭނެ ކަމެކެވެ. އަދި އެއީ މީސްތަކުންނަށް ދެވޭނެ ކާނާއެކެވެ."
ފިޠުރު ޒަކާތުގެ ސަބަބުން މުޖުމަތަމައުގެ އަފްރާދުންގެ މެދުގައި ލޯތްބާއި، ކުލުނާއި، އެކުވެރިކަން ގާއިމު ވެގެންދާނެ ކަމަށް ޚުތުބާގައި ހަނދުމަ ކޮށްދެއްވާފައިވެއެވެ. އަދި ޢިދުގެ އުފަލުގައި އެންމެންނަށް ބައިވެރި ވެވޭނެކަމާއި ޢީދަކީ އެންމެންނަށް ވެސް އުފާވެރި މުނާސަބަތަށް ވާނެ ކަން ވެސް ހަނދުމަ ކޮށްދެއްވާފައިވެއެވެ.
ކީރިތި ރަސޫލާ (ޞޢވ) ސިފަ ކުރައްވާފައިވާ ފަދަ އެއްބަނޑު އެއްބަފާ މުޖުތަމައުއަކަށް އިސްލާމީ މުޖުތަމައު ވާނީ އުފަލާއި ހިތާމައިގައި މުޖުތަމައުގެ އެންމެންނަށް ބައިވެރިވެވިގެންނެވެ.
ޚުތުބާގައި އިތުުރަށް ވިދާޅުވީ ފިޠުރު ޒަކާތަކީ އަތްމަތިދަތި ހާލުގައި ވެސް ހޭދަކުރުމަށް މުސްލިމުންނަށް ދެވޭ ތަމްރީނެއް ކަމަށެވެ. މުސްލިމުންގެ އަތްތައް އަބަދުވެސް ވާން ޖެހޭނީ ހޭދަކުރާ އަތްތަކަކަށް ކަމަށާއި މި ޒަކާތުގެ ސަބަބުން އަހަރު ތެރޭގައި އެންމެ ދުވަހަކު ނަމަވެސް ހޭދަ ކުރާ މީހަކަށް ވުމުގެ މާތްކަން ކޮންމެ މުސްލިމަކަށްމެ ހާސިލު ވެގެންދާނެކަން ވެސް ޚުތުބާގައި ހަނދުމަ ކޮށްދެއްވާފައިވެއެވެ.
މީގެއިތުރުން ޚުތުބާގައި ވިދާޅުވެފައި ވަނީ ފިޠުރު ޒަކާތަކީ ތިމާއާއި ތިމާ ޚަރަދުދީ ބަލަހައްޓަން ޖެހިފައިވާ މީހުންނަށް ޢީދު ދުވަހާ ޢީދު ވިލޭރެއަށް ބޭނުންވާ ކާބޯތަކެތި ހުރެ، އިތުރުވެއްޖެނަމަ ދޭން ޖެހޭ އެއްޗެއް ކަމަށެވެ.
ކުޑަކުދިން ބާލިޣް ވަންދެން އަދި އަންހެން ކުދިން ބާލިޣް ވިޔަސް މީހަކާ އިންނަންދެން އެކުދިންނަށް ޓަކައި ޒަކާތް ދެއްކުން ބައްޕަގެ މައްޗަށް ވާޖިބުވާނެއެވެ.
ޖުމްހޫރުން ވިދާޅުވާ ގޮތުގައި ޢީދުވިލޭރެއަށް އިރުއޮއްސުމުން ފިޠުރު ޒަކާތް ވާޖިބުވާނެއެވެ. ޝާފިޢީން ވިދާޅުވާ ގޮތުގައި ރަމަޟާން މަހަށް ހަނދުބެލުމުން ފިޠުރު ޒަކާތް ނެރެވިދާނެއެވެ. އެކަމަކު، ޢީދު ނަމާދަށްވުރެ ފިޠުރު ޒަކާތް ދިނުން ލަސްނުކުރުން ސުންނަތް ވެގެންވާ ކަމަށް ވެސް ޚުތުބާގައި ވަނީ ހަނދުމަކޮށްދެއްވާފައެވެ. އަދި އުޛުރަކާއި ނުލައި، ޢީދު ދުވަހަށް ވުރެ ލަސްކުރުމަކީ ފާފަވެރިވާނެ ކަމެއް ކަމަށް ވެސް ހަނދުމަ ކޮށްދެއްވާފައިވެއެވެ.
ޚުތުބާގައި ވިދާޅުވެފައި ވަނީ ފިޠުރު ޒަކާތް ނެގުމަށްފަހު ޢީދު ނަމާދުގެ ކުރިން ފިޠުރު ޒަކާތް ބެހުމަކީ ވެސް ދީނުގައި ކަނޑައަޅުއްވާފައިވާ ކަމެއް ކަމަށެވެ.
