ރައީސް ނަޝީދުގެ ގެކޮޅު ހުންނަ މަގުގައި ސައިކަލު ޕާކު ނުކުރެވޭ ގޮތަށް ބަދަލު ކުރުމަށް އެމްއެންޑީއެފުން އެދުނު

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ގެކޮޅު ހުންނަ މަގުގައި ސައިކަލު ޕާކު ނުކުރެވޭ ގޮތަށް ހަދައިދިނުމަށް އެމްއެންޑީއެފުން މާރޗު މަހުގެ ތެރޭގައި އެދިފައިވާކަން ހާމަވެއްޖެއެވެ.

Ads by STELCO

އެމްއެންޑީއެފުން މިގޮތަށް ބަދަލު ކޮށްދިނުމަށް ސިޓީ ކައުންސިލުގައި އެދުމުން، އެކަން އެގޮތަށް ބަދަލު ކޮށްދިނުން އެދި ސިޓީ ކައުންސިލުން ހައުސިންގ މިނިސްޓަރަށް ފޮނުވާފައިވާ ސިޓީއެއް މީސްމީޑިއާގައި ވަނީ އާންމުވެފައެވެ.

މާލޭ ސިޓީ ކައުންސިލްގެ ސެކްރެޓަރީ ޖެނެރަލް އަހްމަދު ޝަރީފް ސޮއި ކުރައްވާ މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމަށް ފޮނުއްވާފައިވާ މި ސިޓީގެ ކޮޕީއެއް “ދެން”އަށް ވެސް ވަނީ ލިބިފައެވެ.

އެ ސިޓީގައި ވިދާޅުވެފައި ވަނީ ރައީސް މުހައްމަދު ނަޝީދު މިހާރު ދިރިއުޅުއްވާ ގެކޮޅު ކެނެރީގެ ހުންނަ ނިލޯފަރު ހިނގުމަކީ ހަނި ގޯޅިއަކަށް ވެފައި އަދި އެ ގޯޅީގެ އެއްފަރާތުގައި ސައިކަލު ޕާކު ކޮށްފައި ހުރުމުގެ ސަބަބުން އެމަނިކުފާނަށް ސެކިއުރިޓީ ފޯރުކޮށްދިނުމަށް ދަތިތަކާ ކުރިމަތިވާކަން މިނިސްޓްރީ އޮފް ނޭޝަނަލް ޑިފެންސް ފޯސްއިން އެ ކައުންސިލަށް އަންގަވާފައިވާ ކަމަށެވެ. އަދި އެ މަގު ސައިކަލް ޕާކު ނުކުރެވޭ މަގަކަށް ހަދައިދިނުމަށް ވެސް އެދިލައްވާފައިވާ ކަމަށް ވެސް އެ ސިޓީގައި ވިދާޅުވެފައިވެއެވެ.

މީގެ އިތުރުން އެ މަގު ވެހިކަލް ޕާކު ނުކުރެވޭ މަގަކަށް ބަދަލުވުމުން  އެ ސަރަހައްދުގައި ޕާކުކޮށްފައިވާ ވެހިކަލްތައް ޕާކު ކުރުމަށް ޖާގައެއް ހޯދައިދޭން ޖެހޭ ކަމަށް ދެކިވަޑައިގަންނަވާ ކަމުގައި ވެސް އެ ސިޓީގައި ވަނީ ވިދާޅުވެފައެވެ. އަދި ޕާކު ކުރުމަށް ޖާގަ ހެދުމަށް މި ވަގުތު އެންމެ އެކަށޭނެ ޖާގައެއްގެ ގޮތުގައި ބެލެވެނީ ބިއްލޫރިޖެހިގެއިން ކަމުގައި ވާތީ އެ ސަރަހައްދުގައި ޕާކިން ޒޯނެއް ހެދުމަށް ހުއްދަ ދެއްވުމަށް އެ ސިޓީގައި ވަނީ އެދިލައްވާފައެވެ.

ރައީސް ނަޝީދަށް ހަމަލާ ދީފައި ވަނީ އެމަނިކުފާނު ދިރިއުޅުއްވާ ގެ ކައިރީ ޕާކު ކޮށްފައި ހުރި ސައިކަލެއްގައި ގޮވާ އެއްޗެއް ހަރު ކޮށްގެނެވެ. އަދި އެމަނިކުފާނު ކާރަށް އަރުއްވަން ވަޑައިގެންނެވި ވަގުތަށް އޭތި ގޮއްވާލުމުން، ނަޝީދުގެ އިތުރުން ހަތަރު މީހަކަށް ވަނީ އަނިޔާވެފައެވެ.