ފިޔަވަޅުތަކަށް ބޯ ނުލަނބާނަމަ، އިތުރު ފިޔަވަޅުތައް އަޅަން ޖެހިދާނެ: ރައީސް
ކޮވިޑް-19ގެ ބަލި ރާއްޖޭގައި ހަލުވިކަމާއެކު ފެތުރެމުންދާތީ ބަލި ކޮންޓްރޯލް ކުރުމަށް މިހާރު އަޅައިފައިވާ ފިޔަވަޅުތަކަށް ބޯ ނުލަނބާނަމަ އިތުރު ފިޔަވަޅުތައް އަޅަން ޖެހިދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މިރޭ 19:00ގައި ގައުމާ މުހާތަބު ކުރައްވައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ޞާލިހު ވިދާޅުވީ އަދިވެސް ވަގުތު ފާއިތު ނުވާ ކަމަށެވެ. އަދި ފަރުދީ ޒިންމާ އަދާ ކުރެއްވުމަށް އެމަނިކުފާނު ރައްޔިތުންނަށް އިލްތިމާސް ކުރެއްވިއެވެ.
އިތުރަށް ވާހަކަފުޅު ދައްކަވަމުން ރައީސް ވިދާޅުވީ ފިތުރު ޢީދު އަޅުގަނޑުމެންނާ ބައްދަލު ކުރާއިރު އެޅިފައިވާ އެއް ހުރަހަކީ މިދިޔަ އަހަރުގެ ކުރީކޮޅުން ފެށިގެން މުޅި ދުނިޔޭގައި ފެތުރެމުންދާ ކޮވިޑް-19ގެ ބަލިމަޑުކަން ކަމަށެވެ. މި ބަލިން ދިވެހި ރައްޔިތުން ރައްކާތެރި ކުރުމަށް ޓަކައި ވެރިރަށް މާލެ ފުރަބަންދުގައި އެތައް ދުވަހެއް ބާއްވައި ބޯޑަރުތައް ބަންދުކޮށް ފަތުރުވެރިކަން މެދުކަނޑައިލެވުނު ކަމުގައި ރައީސް ފާހަގަ ކުރެއްވިއެވެ.
އޭގެ ސަބަބުން ބަލި ޖެހޭ މީހުންގެ އަދަދު ވަރަށް ބޮޑަށް ދަށަށް ދިޔަ ކަމަށާއި ނަމަވެސް އިޤްތިޞާދަށް ވަރަށް ބޮޑު ހީނަރުކަމެއް ލިބުނު ކަމަށް ރައީސް ފާހަގަ ކުރެއްވިއެވެ. އަދި މިހާރު ރާއްޖޭގެ ބޯޑަރުތައް ހުޅުވައިލައި ފަތުރުވެރިކަން ފަށާފައި ވިޔަސް އަދިވެސް ރާއްޖޭގެ އިޤްތިޞާދު އޮތީ ވަރަށް ނާޒުކު ފައްތަރެއްގައި ކަމަށް ވެސް އެމަނިކުފާނު ވިދާޅުވިއެވެ.
"މިހާރުގެ ހާލަތަށް ބަލާއިރު މި ބައްޔާ ދެކޮޅަށް އަޅުގަނޑުމެން އެންމެންނަށް އެކުގައި މަސައްކަތް ނުކުރެވިއްޖެނަމަ ސިއްހީ ނިޒާމަށް އޮބި ނޯންނަ މިންވަރަށް ހާލަތު ގޯސްވެދާނެ" ރައީސް ވިދާޅުވިއެވެ.
މީގެ އިތުރުން މިހާރު އަޅައިފައިވާ ފިޔަވަޅުތައް ތަންފީޒު ކުރުމަށް ރައްޔިތުންގެ އެހީތެރިކަން ބޭނުންވާ ކަމަށާއި މުޅި މުޖުތަމައުގެ ރައްކަލަށް ޓަކައި މި ފިޔަވަޅުތައް ތަންފީޒު ކުރަން ޖެހޭ ކަމަށް ރައީސް ވިދާޅުވިއެވެ.
