ހަމަލާއަށްފަހު ރައީސް ނަޝީދުގެ ފުރަތަމަ ޓްވީޓް: ހެޔޮވެރިކަން ހޯދައިދިނުމުގައި ދެމި ހުންނާނަން
06 މެއި 2021ވަނަ ދުވަހުގެ ރޭ ދިވެހިރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ބޮމުގެ ހަމަލާއެއް ދީ އެމަނިކުފާނު ޒަހަމް ކޮށްލި ފަހުން ފުރަތަމަ ފަހަރަށް ޓްވީޓެއް ކުރައްވައިފިއެވެ.
ރައީސް ނަޝީދުގެ ޓްވީޓްގައި އެންމެ ފުރަތަމަ ވެސް ވަނީ ދިވެހިރާއްޖޭގެ ސިއްހީ ދާއިރާއަށް މަރުހަބާ އާއި ޝުކުރު ދަންނަވާފައެވެ. އަދި އޭގެ އިތުރުން އެ ޓްވީޓްގައި އެމަނިކުފާނު ވިދާޅުވީ މާތްﷲގެ ހެޔޮ ރަހުމަތްފުޅުން ރައްޔިތުން އެދިވަޑައިގަންނަވާ ހެޔޮ ވެރިކަން ހޯދައިދިނުމުގައި ދެމި ހުންނަވާނެ ކަމަށެވެ.
ރައީސް ނަޝީދުގެ އެ ޓްވީޓްގައި އެމަނިކުފާނު ވަނީ ފިތުރު އީދުގެ ހެޔޮއެދުމާއި ތަހުނިޔާ ދިވެހި ރައްޔިތުންނަށް އަރިސްކުރައްވާފައެވެ.
ރައީސް ނަޝީދަށް ބޮމުގެ ހަމަލާއެެއް ދީ ޒަހަމް ކޮށްލެވުނީ މީގެ 6 ދުވަސް ކުރިން އެމަނިކުފާނު ދިރިއުޅުއްވާ ގެކޮޅުން ކެނަރީގެއިން ނުކުމެވަޑައިގެން ނީލޯފަރު ހިނގުމުން ހިންގަވާފައި މަޖީދީ މަގުގައި އޮތް އެމަނިކުފާނުގެ ކާރުކޮޅަށް އަރުއްވަން ވަޑައިގަންނަވަނިކޮށެވެ. މި ހަމަލާގައި ގިނަ ޒަހަމްތަކެއް ލިބިވަޑައިގެން އެމަނިކުފާނު އަދިވެސް ދަނީ އޭޑީކޭ ހޮސްޕިޓަލުގައި ފަރުވާ ހޯއްދަވަމުންނެވެ. އެހެން ނަމަވެސް މިހާރު އެމަނިކުފާނުގެ ހާލުކޮޅު ރަނގަޅުކަމަށް އާއިލާއިން މައުލޫމާތު ދެއްވައެވެ.
