އަމަލުތައް ކުރުންމަތީ ދެމިހުރުމަކީ ހެޔޮ އަމަލު ގަބޫލު ކުރެއްވި ކަމުގެ ނިޝާނެއް: ޚުތުބާ
މިއަދުގެ ހުކުރު ޚުތުބާ ޚާއްސަ ކޮށްފައި ވަނީ ހެޔޮޢަމަލުތައް ކުރުންމަތީ ދެމިހުރުމުގެ މުހިންމުކަމުގެ މައްޗަށެވެ.
ޚުތުބާގައި ފާހަގަ ކުރައްވާފައިވާ ގޮތުގައި އަޅުން ކުރާ ހެޔޮ ޢަމަލު، ﷲ ޤަބޫލުކުރެއްވިކަމުގެ ނިޝާންތަކެއް ވެއެވެ. އެއީ، އެ ޢަމަލުތައް ކުރުން ދޫކޮށް ނުލައި، ފާފަތަކަށް އަރައި ނުގަނެ ހުރުމެވެ. ކުރެވުނު ހެޔޮ ޢަމަލުތައް ﷲގެ ޙަޟްރަތުގައި މަޤްބޫލު ޢަމަލަކަށް ނުވެ ހިނގައިދާނެތީ ބިރުވެތިވުމެވެ. އަދި އިތުރު ހެޔޮ ޢަމަލުތައް ކުރުންމަތީ ދެމިހުރުމުގެ ތައުފީޤު ލިބުމެވެ. ކުރެވުނު ހެޔޮ ޢަމަލާ މެދު ބޮޑާވުމުގެ ބަދަލުގައި، އެ ޢަމަލުގެ މަދުކަން އިޙްސާސްވުމެވެ. ހެޔޮ ޢަމަލަށާއި ޞާލިޙުންނަށް ލޯބި ޖެހި، ފާފަތަކަށާއި ފާސިޤުންނަށް ނުރުހުންތެރިކަން އުފެދުމެވެ.
"މުސްލިމް އަޚުންނޭވެ! ހަމަ ކަށަވަރުން، ރަޙްމަތާއި، ބަރަކާތުން ފުރިގެންވާ ރަމަޟާން މަސް މި ވަނީ އަޅުގަނޑުމެންނާ އަލްވަދާޢު ކިޔައިފައެވެ. އެ މައްސަރުގައި އަޅުތަކުން ކުޅަ ޢަމަލުތަކުގެ ފަތްތައް ﷲ ގެ ޙަޟްރަތަށް އުފުއްލިގެން ދާނެއެވެ. އެ ޢަމަލުތައް ޤަބޫލު ކުރައްވައި، ނަރަކައިން މުއްތި ކުރެއްވުނު މީހަކަށް ހުރި ހެޔޮކަމެއްގެ ބޮޑުކަމާއެވެ! އަދި އެ ޢަމަލުތައް އަނބުރާ ރައްދުކުރެއްވޭ މީހަކަށް ހުރި ނުބައިކަމެއްގެ ބޮޑުކަމާއެވެ! މާތް ﷲ އަޅަމެންނަށް އެފަދަ ދެރަ ގޮތެއް މިންވަރު ނުކުރައްވާށިއެވެ!" ޚުތުބާގައި ހަނދުމަ ކޮށްދެއްވާފައިވެއެވެ.
އަޅުގަނޑުމެންގެ ތެރެއިން ބައެއް މީހުން ރަމަޟާން މަހު ނަމާދުގެ ޖަމާޢަތަށް ރައްކާތެރިވެ، ގިނަގިނައިން ޤުރްއާން ކިޔަވައި، މީސްތަކުންނަށް ހެޔޮ ފޯރުވައި އުޅުމަށްފަހު، ރަމަޟާން މަސް ނިމުމުން ކަންކަމަށް ފަރުވާކުޑަކޮށް، ފާފަތަކަށް އަރައިގަންނަކަމީ ވިސްނަން ޖެހިފައިވާ ކަމެކެވެ. މިއީ މީހަކު އެތައް ޚަރަދަކާއި، މަސައްކަތެއް ކޮށްގެން، ރަނގަޅު ބިނާއެއް ކުރުމަށް ފަހު، އެ ބިނާ ފުނޑުފުނޑުކޮށްލުން ފަދަ ކަމެއް ނޫން ހެއްޔެވެ؟ ރަމަޟާން މަހަކީ މުޅި އަހަރުތެރޭގައި ކުރެވުނު ފާފަތައް ފޮހެލުމަށް ﷲ ދެއްވާފައިވާ ރަނުގެ ފުރުޞަތެކެވެ.
ރަމަޟާން މަސް އަޅުގަނޑުމެންނާ އަލްވަދާއުކީ ކަމުގައި ވިޔަސް އިސްލާމްދީނުގައި ލައްވައިފައިވާ ހެޔޮކަމުގެ ފުރުސަތުތައް ވަރަށް ގިނައެވެ. އޭގެތެރެއިން އެންމެ މުހިންމު އެއް ފުރުސަތަކީ ޝައްވާލު މަހުގެ ހަ ރޯދައެވެ.
ރަސޫލާ (ޞޢވ) ހަދީޘްފުޅުކުރެއްވި ބަސްފުޅެއްގެ މާނައިގައިވެއެވެ.
ރަމަޟާން މަހުގެ ރޯދަ ހިފުމަށް ފަހު އެއާ ވިދިގެން، ޝައްވާލު މަހު ހަ ރޯދަ ހިފުމީ މުޅި އަހަރު ދުވަހު ރޯދަ ހިފުން ފަދަ ކަމެކެވެ.
ޝައްވާލު މަހުގެ ހަ ރޯދަ ހިފަން އޮތް އެންމެ މޮޅު އިތުރު ގޮތަކީ ޝައްވާލު މަހުގެ ދެވަނަ ދުވަހުން ފެށިގެން މެދުނުކެނޑި ހަ ރޯދަ ހިފުމެވެ. ނަމަވެސް ޝައްވާލު މަހުގެ ކޮންމެވެސް ހަ ދުވަހެއްގައި ވަކިވަކިން ރޯދަ ހިފިކަމުގައި ވިޔަސް ފުދޭނެއެވެ. ހަ ދުވަހުގެ ރޯދައިގެ އިތުރުން މެދުފޮއި ރޯދައާއި، ހޯމަ ބުރާސްފަތި ދެ ދުވަހުގެ ރޯދަ އާއި، އަރަފާތު ދުވަހުގެ ރޯދައާއި، އާޝޫރާ ދުވަހުގެ ރޯދަ ހިފުމަކީ ވެސް ގިނަގުނަ ދަރުމައާއި ޘަވާބު ހުރި ކަމެކެވެ.
ސުންނަތް ރޯދައިގެ އިތުރުން ވެސް ހެޔޮކަމުގައި މެދުނުކެނޑި ތިބުމަށް ޓަކައި، ދަމު ނަމާދު ކުރުމާއި ކޮންމެ ދުވަހަކު ވެސް ޤުރްއާނުން މިންވަރެއް ކިޔެވުމާއި، ކެރިކުޅާދާނަވީ މިންވަރަކުން ﷲ ގެ މަގުގައި ހޭދަކުރުމާއި، ގާތްތިމާގެ ކަމުގެ ގުޅުން ދެމެހެއްޓުމާއި، އަވައްޓެރިންނާއި މައިންބަފައިންގެ ޙައްޤުތަކާއި އަނބިދަރިންގެ ޙައްޤުތައް އަދާކުރުން ފަދަ ކަންތައްތަކަށް ރައްކާތެރިވުމަށް ނަސޭހަތްތެރިވެ، ޚުތުބާގައިވަނީ ވަޞިއްޔަތް ކުރައްވާފައެވެ.
