ކޮވިޑް-19:އިތުރު މަރެއް، އަދަދު 93 އަށް!
ކޮވިޑް-19 ޖެހިގެން ރާއްޖެއިން އިތުރު މީހަކު ނިޔާވެއްޖެއެވެ.
މައުލޫމާތު ލިބޭ ގޮތުގައި ނިޔާވެފައި ވަނީ ހުޅުމާލެ ކޮވިޑް ފެސިލިޓީގައި ފަރުވާ ހޯދަމުން ދިޔަ 87 އަހަރުގެ ދިވެހި ފިރިހެނެކެވެ.
މިއީ ރާއްޖެއިން ކޮވިޑް ޖެހިގެން ނިޔާވި 93 ވަނަ މީހާއެވެ.
ފާއިތުވެދިޔަ ހަފްތާއެއްހާ ދުވަހުގެ ތެރޭގައި ރާއްޖެއިން ކޮވިޑް-19 ޖެހިގެން މަރުވާ މީހުންގެ އަދަދު ވަނީ އިތުރުވެފައެވެ.
މިއީ މިމަހުގެ ތެރޭގައި ރާއްޖެއިން ޖެހިގެން ނިޔާވި 20 ވަނަ މީހާއެވެ. އަދި މިއަހަރު މިބަލީގައި މަރުވި 42 ވަނަ މީހާއެވެ.
ރާއްޖެއިން ކޮވިޑް-19 ޖެހޭ މީހުންގެ އިންސައްތަ ވެސް ވަނީ ބޮޑު ތަނުން އިތުރު ވެފައެވެ. އެގޮތުން ފާއިތުވި 6 ދުވަހު ރާއްޖެއިން ފައްސިވި މީހުންގެ އަދަދު އުޅެނީ ހާހުން މަތީގައެވެ. އިއްޔެ އެކަނި ރާއްޖެއިން 1،467 މީހަކަށް ބަލި ޖެހި، ބަލި ޖެހުނު ޖުމްލަ މީހުންގެ އަދަދު ވަނީ 43،775 އަށް އަރާފައެވެ.
މި ބަލި ޖެހުނު މީހުންގެ ތެރެއިން 27،672 މީހަކު ވަނީ ބަލިން ރަނގަޅުވެފައެވެ. މިހާރު ބަލި ޖެހިގެން 15،003 މީހަކަށް އަންނަނީ ފަރުވާ ދެމުންނެވެ. އޭގެ ތެރެއިން 290 މީހަކަށް ފަރުވާ ދެމުން އަންނަނީ ހޮސްޕިޓަލުގައި ބާއްވައިގެން ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސް ހިސާބުތަކުން ދައްކައެވެ.
