މަސްއޫލިއްޔަތު އަދާކުރުންމަތީ ހިތްވަރާ އެކު ދެމިހުންނާނަން: ރައީސް ނަޝީދު
މިމަހުގެ ހަވަނަ ދުވަހު މަޖިލީހުގެ ރައީސް ނަޝީދަށް އަމާޒުކޮށްދިން ހަމަލާއަށް ފަހު މިއަދު ކުރިއަށްދާ މަޖިލީހުގެ ދެވަނަ ދައުރުގެ ފުރަތަމަ ޖަލްސާގައި ރައީސް ނަޝީދުގެ ހާއްސަ މެސެޖެއް އިއްވައިފިއެވެ.
ނަޝީދު ވިދާޅުވީ ގައުމުގެ މަސްލަހަތު އިސްކުރައްވައި، ދިވެހި ރައްޔިތުންގެ ރައްކާތެރިކަމާއި ލާބަ އާއި މަންފާ އަށް މަސައްކަތް ކޮށްދެއްވާނެކަމުގެ ޔަގީންކަން ދެއްވާ ކަމަށެވެ. އަދި ރައްޔިތުން އެދިވަޑައިގަންނަވާ ގޮތަށް މަސްއޫލިއްޔަތު އަދާކުރުންމަތީ ހިތްވަރާ އެކު ދެމިހުންނާނެ ކަމަށް ވިދާޅުވިއެވެ.
“މާތް ﷲގެ ހެޔޮ ރަހުމަތްފުޅާ އެކު ތިޔަ ބޭފުޅުން ތިޔަ އެދިވަޑައިގަންނަވާ ގޮތަށް އަޅުގަނޑުގެ މަސްއޫލިއްޔަތު އަދާކުރުން މަތީ ހިތްވަރާ އެކު ދެމިހުންނާނަން،" ރައީސް ނަޝީދު ވިދާޅުވިއެވެ.
ރައީސް ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް 15 ދުވަހުގެ ބަންދުގެ މުއްދަތެއް ޖަހައިފައެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނަސް ބޮޑަށް ގުޅެނީ ހަރުކަށި ފިކުރާ ކަމަށް ފުލުހުން ވަނީ ވިދާޅުވެފައެވެ.
ރައީސް ނަޝީދަށް މިހައިތަނަށް ފަރުވާ ދީފައި ވަނީ އޭޑީކޭ ހޮސްޕިޓަލުގައެވެ. އެގޮތުން 16 ގަޑިއިރު ތެރޭ އެމަނިކުފާނުގެ ހަތަރު އޮޕަރޭޝަނެއް ކުރަން ޖެހުނު ކަމަށް އޭޑީކޭއިން ހޮސްޕިޓަލުން ބުނެފައިވެއެވެ. އަދި ރައީސް ނަޝީދުގެ ހަށިކޮޅަށް 10 ރޭޒަ ފުއް ވަދެފައިވާ ކަމަށާއި ހަށިކޮޅުގެ މުހިންމު ގުނަވަންތައް ފޫއަޅުވައިލި ކަމަށް ވެސް އޭޑީކޭއިން ބުނެފައިވެއެވެ.
ވެރިކަމާހެދި ހޭބަލިވާ
މަސް އޫލއްޔަތަކީ ކޮން އެއްޗެއް ކަން އެނގިލައްވާތޯ