ސްޓެލްކޯގެ ބޮޑު ޓީވީއަށް ފަލަސްތީނު ދިދަ އަރުވައިފި
ބޮޑުތަކުުރުފާނު މަގަށް ވާ ގޮތަށް ހުންނަ ސްޓެލްކޯގެ ބޮޑު ޓީވީގައި ފަލަސްތީނުގެ ދިދަ ދައްކާލައިފިއެވެ.
ސްޓެލްކޯއިން ވަނީ މިކަމާ ގުޅިގެން ޓްވީޓެއް ވެސް ކޮށްފައެވެ. އެ ޓްވީޓްގައި ލިޔެފައި ވަނީ "ފްރީ ފަލަސްތީން" މިހެންނެވެ. އަދި މިހާރު ސްޓެލްކޯގެ ސްކްރީންގައި އަޅުވައިފައިވާ މަންޒަރު ދައްކުވައިދޭ ވީޑިއޯއެއް އެ ޓްވީޓްގައި ވަނީ ހިއްސާ ކޮށްފައެވެ.
ސްޓެލްކޯގެ ސްކްރީންގައި ފަލަސްތީނުގެ ދިދަ އަޅުވައިފައިވާއިރު ސިފައިންގެ ހެޑް ކުއާޓާސް ބަންޑާރަ ކޮށީގައި މާލޭގެ މަލަމައްޗަށް ވާ ގޮތަށް ހުންނަ ބޮޑު ސްކްރީނުގައި ވެސް ވަނީ ފަަލަސްތީނު ދިދަ އަޅުވައިފައެވެ.
ގިނަ އަދަދެއްގެ ދިވެހީން އަންނަނީ އިޒްރޭލުން ފަލަސްތީނަށް ދެމުން އަންނަ ލާއިންސާނީ، ރަހުމުކުޑަ ހަމަލާތަކާ ދެކޮޅަށް އަޑު އުފުލަން ފަށައިފައެވެ. އެގޮތުން މިއަދު ހަވީރު ވަނީ "ފްރީ ފަލަސްތީން"ގެ ނަމުގައި ހަރަކާތެއް ވެސް ބާއްވާފައެވެ. އެ ހަރަކާތުގައި ގޭގޭގެ ބެލްކަނީތަކަށް ފަލަސްތީނުގެ ދިދަ ހިފައިގެން ގިނަ ބަޔަކު ވަނީ ނުކުމެ އަޑު އުފުލައިފައެވެ.
