ވިލިމާލޭގައި 10 ބުރިއަށް އިމާރާތް ކުރެވޭނެ ގޮތް ހަދަނީ!
ވިލިމާލޭގައި 10 ބުރިއަށް އިމާރާތް ކުރެވޭނެ ގޮތް ހެދުމަށް ކަމާ ބެހޭ ފަރާތްތަކަށް ހުށަހެޅުމަށް މާލޭ ސިޓީ ކައުންސިލުން ނިންމަވައިފިއެވެ.
ވިލިމާލޭގައި މިހާރު އެންމެ އުސްކޮށް އިމާރާތް ކުރެވެނީ ހަ ބުރިއަށެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި މާލޭގެ އައު މޭޔަރު ޑރ.މުޙައްމަދު މުޢިއްޒު ވިދާޅުވީ ބައިބަޔަށް ގޯތި ބެހުމާއި އަދި އާއިލާ ބޮޑުވުމާ ގުޅިގެން ބޯހިޔާވަހި ކަމުގެ މައްސަލަ ވިލިމާލެއަށް ވަރަށް ބޮޑުވެފައިވާ ކަމަށާއި އިމާރާތް ކުރުމަށް ލޯން ލިބުމުގައި ވެސް ވިލިމާލޭގެ ރައްޔިތުންނަށް ދަތިވެފައިވާ ކަމަށެވެ.
"ބޭންކްތަކުން ފައިނޭންސްކޮށްދެނީ މަދުވެގެން 10 ބުރިއަށް ނެގޭވަރުގެ ގޮތަކަށް ހަމަޖެހިގެންވާތީ އެކަމަށް ހައްލެއް ހޯދުމަށް ރައްޔިތުން އެދެމުން ދިޔައީ ،އެހެންވީމަ އެކަމަށް ހައްލެއް ގެނެސްދިނުމަށް ވިލިމާލޭގައި އިމާރާތް ކުރެވޭ އުސްމިން 10 ބުރިއަށް ބަދަލުކުރުމަށް ކަމާބެހޭ އިދާރާތަކަށް ހުށަހެޅުމަށް ކުރަންޖެހޭ އެންމެހައި ކަންކަން ކުރުމަށް އަޅުގަނޑުމެން މިއަދު އިއްތިފާގުން މި ނިންމީ" މުއިއްޒު ވިދާޅުވިއެވެ.
ވިލިމާލޭގައި 10 ބުރިއަށް އިމާރާތްކުރެވޭ ގޮތަށް ގަވާއިދު ބަދަލު ކުރުމަށް މަސައްކަތް ކުރުމަކީ މުޢިއްޒުގެ ކެންޕެއިން ވަޢުދެކެވެ. މާލެ ސިޓީގެ ހަތަރު ވަނަ ދައުރުގެ ފުރަތަމަ ޖަލްސާއިން އިއްޔެ ފާސްކުރި އެކްޝަން ޕްލޭންގައި، ވިލިމާލޭގައި ރައްޔިތުންގެ ގޯތީގައި އިމާރާތްކުރެވޭ އުސްމިން 10 ބުރިއަށް ބަދަލުކުރުމަށް މަސައްކަތްކުރުން ވަނީ ހިމަނައިފައެވެ. މިކަން ފާސްކޮށްފައި ވަނީ ކައުންސިލްގެ ހުރިހާ މެންބަރުންގެ އިއްތިފާޤުންނެވެ.
މުޢިއްޒު ވިދާޅުވީ، މިކަން ކުރުމަށް އެންމެ ފުރަތަމަ ކުރާނެ ކަމަކީ ރައްޔިތުންގެ ޚިޔާލު ހޯދުން ކަމަށެވެ. އަދި މިކަން ކުރުމުން އަންނާނެ ބަދަލުތަކާ ބެހޭ ގޮތުން އާބަން ޑިވެލޮމްޕެންޑް ދާއިރާގެ ފަންނީ ބޭފުޅުންގެ ލަފާ ހޯދައި ، މިއީ ޤާނޫނަށް ގެންނަން ޖެހޭ ބަދަލަކަށް ވާތީ ޤާނޫނީ ބޭފުޅުންގެ ލަފާ ހޯއްދެވުމަށް ފަހު، ކަމާބެހޭ އިދާރާއަށް ހުށަހެޅުމަށް ނިންމާފައިވާ ކަމަށްވެސް މުޢިއްޒު ވިދާޅުވިއެވެ.
Ads by STO
