ކޮވިޑް-19 ހާލަތު މަޖިލީހަށް ގޯހެއް ނުވި، މައްސަލަ ބޭރުކޮށްލަން ނިންމައިފި
ކޮވިޑްގެ ހާލަތު އިތުރަށް ގޯސްވެ، ވަރަށް ބޮޑަށް ބަލި ފެތުރެމުންދާތީ ވަސީލަތްތައް ގާއިމްކޮށް އަދި އީޖާބީ މަސައްކަތްތައް ހަލުއި ކުުރުމަށް ސަރުކާރަށް ގޮވައިލައި ހުށަހެޅި މައްސަލަ މަޖިލީހުން ބޭރުކޮށްލައިފިއެވެ.
މިމައްސަލަ މަޖިލީހަށް ހުށަހަޅާފައި ވަނީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ. މިމައްސަލަ ކުރިޔަށް ގެންދިއުމަށް ފެންނަ ކަމަށް ވޯޓް ދެއްވީ 12 މެންބަރުންނެވެ. އަދި ނުފެންނަ ކަމަށް 18 މެންބަރަކު ވޯޓް ދެއްވިއެވެ. މިހެންވެ މައްސަލަ ކުރިޔަށް ގެންދިއުމަށް ފާހެއް ނުވިއެވެ.
އާދަމް ޝަރީފް މައްސަލަ ހުށަހަޅުއްވަމުން މިއަދު ވިދާޅުވެފައި ވަނީ މާލެއާއި ރާއްޖޭގެ އެކި ސަރަހައްދުތަކުގައި ކޮވިޑް-19އަށް ފައްސިވާ މީހުންގެ އަދަދާއި އެބަލީގައި ނިޔާވާ މީހުންގެ އަދަދު ދުވަހުން ދުވަހަށް އިތުރުވާ ކަމަށެވެ. މި ކަމުގެ ސަބަބުން، ސިއްހީ ހިދުމަތްތެރިން ވަރުބަލިވެ މުޅި ފަރުވާގެ ނިޒާމަށް ލޮޅުން އަރައި އެކަށީގެންވާ ފަރުވާ ނުދެވޭ ކަަމަށް ވެސް އާދަމް ޝަރީފް ވިދާޅުވިއެވެ.
މީގެ އިތުރުން، އަތޮޅުތަކުން ކޮވިޑަށް ޓެސްޓްކޮށް ނަތީޖާ ލިބުމުގައި ގޮން ޖެހުންތައް ހުރުމާއެކު ނަތީޖާ ނުލިބި އެތައް ދުވަހަކު މަޑުކުރަން ޖެހޭ ކަމަށާއި އެޑްމިޓްކޮށްގެން ފަރުވާ ދޭން ޖެހޭ މީހުންގެ އަދަދު އިތުރުވެ ބެޑް ކެޕޭސިޓީ އެކަށީގެންވާ ވަރަށް ނެތުމާއެކު ގިނަ ބަޔަކަށް ފަރުވާ ނުދެވި ފުރާނައަށް ނުރައްކާވުމުގެ ފުރުސަތު އޮތް ކަމަށް އޭނާ ވިދާޅުވިއެވެ.
މީގެ އިތުރުން ރާއްޖޭގައި ކޮވިޝީލްޑްގެ ފުރަތަމަ ޑޯޒް ޖެހުމަށް ފަހު، ވެކްސިން ސްޓޮކް ހުސްވެ، ދެވަނަ ޑޯޒް ނުޖެހި އެތައް ހާސް ބަޔަކު އެބަތިބިކަން ފާހަގަކުރެއްވިއެވެ. ޝަރީފް ހުށަހެޅުއްވި މައްސަލަ ނިންމައިލަމުން ވިދާޅުވީ، ކޮވިޑް ޖެހިފައިވާ ބަލި މީހުންނަށް ފަރުވާ ދޭން އިތުރު ވަސީލަތްތައް ގާއިމްކޮށް ވެކްސިން ޕްރޮގްރާމް އަލުން ހިންގުމަށް އަވަސް ފިޔަވަޅުތަކާއި އިންތިޒާމު ހަމަޖައްސަން ސަރުކާރަށް ގޮވައިލާ ކަމަށެވެ.
މިމައްސަލަ ބަލައި ނުގަންނަން މަޖިލީހުން ނިންމި ނަމަވެސް ކޮވިޑްގެ ޙާލަތު ވަނީ ވަރަށް ބޮޑަށް ގޯސްވެފައެވެ. މިއަދު މިހާތަނަށް ކޮވިޑް-9 ޖެހިގެން 6 މީހަކު ވަނީ ނިޔާވެފައެވެ. އަދި މިިދިޔަ 24 ގަޑިއިރުގެ ތެރޭގައި 1،465 މީހަކު މިބަލި ޖެހިފައިވާއިރު، މިވަގުތު 18،000 އަށްވުރެ ގިނަ މީހުންނަށް ބަލި ޖެހިފައިވެއެވެ.
Ads by STO
