ކޮވިޑް-19 މަރެއް: އޭޑީކޭއަށް ގެންދިޔަ މީހަކު ނިޔާވެއްޖެ
އޭޑީކޭ ހޮސްޕިޓަލުގެ އެމަޖެންސީއަށް ގެންދިޔަ މީހަކު ނިޔާވެއްޖެއެވެ.
މައުލޫމާތު ލިބިފައިވާ ގޮތުގައި އޭނާ ވަނީ ކޮވިޑް19 އަށް ފައްސިވެފައެވެ.
"ދެން" އަށް އެނގިފައިވާ ގޮތުގައި ނިޔާވެފައި ވަނީ އުމުރުން ދުވަސްވީ ދިވެހި ފިރިހެނެކެވެ. އޭނާ ހޮސްޕިޓަލަށް ގެންދިޔައީ އަލާމާތްތައް ހުރެގެން ކަމަށާއި ކޮވިޑް-19 އަށް ފައްސިކަން އެނގިފައި ވަނީ ނިޔާވިފަހުން ކަމަށް ވެސް އެނގިފައިވެއެވެ.
ނަމަވެސް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެކަން އަދި އިއުލާނު ކޮށްފައެއް ނުވެއެވެ.
ކޮވިޑް-19 ޖެހިގެން މި މަހު ރިކޯޑު އަދަދަކަށް ރާއްޖެއިން މީހުން ވަނީ ނިޔާވެފައެވެ. އެގޮތުން މި މަހު މިހާތަނަށް 40 މީހުން މި ބަލީގައި ނިޔާވެފައިވެއެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މި ހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
