ކޮވިޑް-19: ފައްސިވީ އަދަދުތައް މިއަދު ވެސް 2،000 އާ ގާތް !
ރާއްޖެއިން ކޮވިޑް-19 އަށް ފައްސިވީ އަދަދުތައް މިއަދު ވެސް 2،000އާ ގާތް ކޮށްފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ އާންމުކުރި ތަފާސް ހިސާބުތަކުން ދައްކާ ގޮތުގައި މިއަދު ރާއްޖެއިން 1،960 މީހުން ކޮވިޑަށް ފައްސި ވެފައިވެއެވެ.
މިއަދު ފައްސިވީ މީހުންގެ ތެރެއިން މާލެއިން ފައްސި ވެފައިވަނީ 1،518 މީހުންނެވެ. އަދި އަތޮޅުތެރެއިން 431 މީހުންނާއި ހިންގަމުން އަންނަ ރިސޯޓުތަކުން 11 މީހަކު ފައްސި ވެފައިވެއެވެ.
ކޮވިޑް-19 އަށް ފައްސިވެ، މި ބަލީގައި ރާއްޖެއިން މިހާތަނަށް 123 މީހުން ނިޔާވެފައިވާ ކަމަށް ރިކޯޑު ކުރެވިފައިވެއެވެ.
މި ފަހަކަށް އައިސް ކޮވިޑް-19 އަށް ރާއްޖެއިން ފައްސިވާ މީހުންގެ އަދަދު އަންނަނީ އިތުރުވަމުންނެވެ. އަދި މި ބަލީގައި ރާއްޖެ އިން ނިޔާވާ މީހުންގެ އަދަދު ވެސް އިތުރުވަމުން އަންނަކަން ފާހަގަ ވެއެވެ.
ބަލި ފެތުރުން ކޮންޓްރޯލު ކުރުމަށްޓަކައި އެޗްޕީއޭ އިން މިހާރު ވަނީ ބައެއް ފިޔަވަޅުތައް ވެސް އަޅާފައެވެ. އެގޮތުން ރާއްޖޭގެ މީހުން ދިރިއުޅޭ ހުރިހާ ރަށެއްގައި ވެސް ބޭރަށް ނުކުންނަ އިރު މާސްކު އަޅައިގެން އުޅުމަށް ވެސް އަންގާފައިވެއެވެ. އަދި މާލެ ސަރަޙައްދާއި އެހެން ބައެއް ރަށްތަކުގައި ހަވީރު 4:00 އިން ފަތިހު 4:00 އަށް ވަނީ ކާފިއު ވެސް އިއުލާނު ކޮށްފައެވެ.
