ރައީސް ނަޝީދަށް އަމާޒުކޮށް ދިން ހަމަލާ: ހައްޔަރުކުރި 3 މީހުންގެ ބަންދުގެ މުއްދަތު އިތުރުކޮށްފި
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ފުރަތަމަ ހައްޔަރު ކުރި 3 މީހުންގެ ބަންދަށް އިތުރު 15 ދުވަސް ޖަހައިފިއެވެ.
ރައީސް ނަޝީދަށް ދިން ހަމަލާގައި ފުރަތަމަ ހައްޔަރު ކޮށްފައި ވަނީ މއ. ފޭރުގެ މުޖާޒް އަހުމަދު އާއި، ގއ. ކޮނޑޭ/ ފޮޅޭމާ ތަހުމީން އަހުމަދުގެ އިތުރުން ވ. ތިނަދޫ/ ހިޔާ އަހުމަދު އަދުހަމް ރަޝީދުއެވެ.
މި ތިން މީހުންގެ ބަންދާމެދު ގޮތެއް ނިންމުމަށް މިމަހުގެ 8ވަނަ ދުވަހު ކްރިމިނަލް ކޯޓަށް ގެންދިއުމުން، ބަންދަށް 15 ދުވަހުގެ މުއްދަތެއް ދީފައިވެއެވެ.
އެ މުއްދަތު ހަމަވުމުން މިއަދު އަނެއްކާ ވެސް ވަނީ އިތުރު 15 ދުވަހުގެ މުއްދަތެއް ޖަހައިފައެވެ.
ރައީސް ނަޝީދުގެ ފުރާނަފުޅަށް ނުރައްކާވާނެހެން ބޮމެއް ގޮއްވައިލާ ހަމަލާ ދީފައި ވަނީ މި މަހު 6 ވަނަ ދުވަހުގެ ރެއެވެ. ކުރުނބާގައި އޮތް ބައްދަލުވުމަކަށް ވަޑައިގަންނަވަން ގެކޮޅުން ނިކުމެވަޑައިގެން ކާރުކޮޅަށް އަރާ ވަޑައިގަންނަވަން އުޅުއްވަނިކޮށް ދިން އެ ހަމަލާއާ ގުޅިގެން އެމަނިކުފާނުގެ ހާލުކޮޅު ސީރިއަސް ވެ، އޭޑީކޭ ހޮސްޕިޓަލުގައި 16 ގަޑިއިރު ތެރޭ ހަތަރު އޮޕަރޭޝަން ކޮށްފައިވެއެވެ. އެއަށް ފަހު އިތުރުފަރުވާއަށް މިހާރު އެމަނިކުފާނު ހުންނެވީ ޖަރުމަނުގައެވެ.
