ޑޮކްޓަރުކަން ކިޔަވައިގެން އިންޓާންޝިޕް ފުރިހަމަ ނުކޮށް ތިބި މީހުން ހޯދަން ފަށައިފި
ޑޮކްޓަރު ކަމުގެ ޑިގްރީ ނެގުމަށް ފަހުގައި އިންޓާންޝިޕް ފުރިހަމަ ނުކުރާ ފަރާތްތައް ހޯދުމަށް ހެލްތު މިނިސްޓްރީން އިއުލާން ކޮށްފިއެވެ.
ހެލްތު މިނިސްޓްރީން މިފަދަ މީހުން ހޯދަން އިއުލާން ކޮށްފައި ވަނީި ކޮވިޑް-19 ގެ މި ނުރައްކާތެރި ބަލިމަޑުކަމުގައި އިންސާނީ ވަސީލަތްތައް ރާއްޖޭގައި މަދުވެދާނެ ކަމުގެ ބިރު އޮތުމުންނެވެ.
ހެލްތު މިނިސްޓްރީން ކުރި އިއުލާނުގައި ބުނެފައި ވަނީ އެމް.ބީ.ބީ.އެސް ޑިގްރީ ފުރިހަމަ ކުރުމަށް ފަހު، އިންޓާންޝިޕް ފުރިހަމަ ކުރުމުގެ ފުރުޞަތު ލިބިފައި ނުވުމުގެ ސަބަބުން މިވަގުތު ރާއްޖޭގައި ތިބި ފަރާތްތަކުގެ މަޢުލޫމާތު ހޯދުމަށް ބޭނުންވާ ކަމަށެވެ.
ހެލްތު މިނިސްޓްރީން އެދެނީ މިފަދަ ފަރާތްތަކުގެ ފުރިހަމަ ނަމާއި، އެޑްރެސް އަދި ކިޔެވި ގައުމާއެކު ގުޅޭނެ ނަމްބަރާއި އީމެއިލް އެޑްރެސް ޖެހުމަށް ފަހު ހެލްތު މިނިސްޓްރީގެ އީމެއިލް އެޑްރެސް ކަމަށްވާ [email protected] އަށް ފޮނުވުމަށެވެ. އަދި މި މައުލޫމާތު ފޮނުވުމުގެ ސުންގަޑިއެއްގެ ގޮތުގައި މިނިސްޓްރީން ކަނޑައަޅައިފައި ވަނީ ޖޫން މަހުގެ 3 ވަނަ ދުވަހުގެ މެންދުރު 1:30އެވެ.
ސަރުކާރުން ވަނީ ރާއްޖެއިން ބޭރުން ނަރުހުންނާއި ޑޮކްޓަރުން ހޯދުމަށް މަސައްކަތް ކުރަމުންދާ ކަމަށް ވެސް ހާމަ ކުރައްވައިފައެވެ.
