އެއާ އިންޑިއާ ފްލައިޓަކުން އެމެރިކާއަށް ވާލެއް ނުގެންދިޔައީ ހަމަ ކިރިޔާ!
އެއާ އިންޑިއާގެ ފްލައިޓެއްގައި ވާލެއް އުޅޭކަމުގެ މައުލޫމާތު ލިބިގެން، ދިއްލީއިން އެމެރިކާގެ ނިއު ޖާރސީއަށް ދާން ދަތުރު ފެށި ފްލައިޓެއް އަނބުރާ އިންޑިއާއަށް ގޮސްފިއެވެ.
ބޭރުގެ ރިޕޯޓުތަކުން ބުނާ ގޮތުގައި މިދިޔަ ބުރާސްފަތި ދުވަހު ނެވާކްއަށް ދާން ނައްޓައިލި އެ ފްލައިޓް، ދަތުރު ފުރިހަމަ ނުކޮށް އަނބުރާ ދިއްލީއަށް ޖެއްސީ، އޭގެ ތެރޭގައި ވާލެއް އުޅޭކަމަށް އެ ފްލައިޓުގެ ޕައިލެޓު، އެއާ ޓްރެފިކް ކޮންޓްރޯލް (އޭޓީސީ)އަށް ރިޕޯޓު ކުރުމާ ގުޅިގެންނެވެ.
އެއާ އިންޑިއާގެ އެ ފްލައިޓު އިންދިރާ ގާންދީ އިންޓަނޭޝަނަލް އެއާޕޯޓް (އައިޖީއައިއޭ)އިން ނައްޓައިލީ އެ ދުވަހުގެ މެންދަމު 2:20 ގައި ކަމަށް ރިޕޯޓުތަކުން ބުނެފައިވެއެވެ. ނަމަވެސް ފްލައިޓް ނައްޓައިލުމަށް ފަހު އޭގެ ގާތްގަނޑަކަށް ބައި ގަޑިއިރެއްހާއިރު ފަހުން ޕައިލެޓަށް ޚަބަރު ލިބުނީ ފްލައިޓުގައި ވާލެއް އުޅޭ ކަމަށެވެ. އެ މައުލޫމާތު ލިބުމާ އެކީ އޭޓީސީއާ މައުލޫމާތު ހިއްސާ ކުރުމަށް ފަހު ޕައިލެޓު ނިންމީ އަނބުރައި އައިޖީއައިއޭއަށް ޖެއްސުމަށެވެ.
ފްލައިޓު އަނބުރައި ޖެއްސީ 3:55 ހާއިރު ކަމަށާއި، ފްލައިޓުން މީހުން ބޭލުމަށް ފަހު ވައިލްޑްލައިފް ސްޓާފުން ގެނެސް އެ ފްލައިޓު ތެރޭގައި އުޅުނު ވާ ހިފި ކަމަށް ވެސް ރިޕޯޓުތަކުން ބުނެއެވެ. އެއަށް ފަހު އެ ފްލައިޓަށް އަނބުރާ މީހުން އަރުވައި ދަތުރު ފެށީ މުޅި ފްލައިޓުން ޖަރާސީމްތައް މެރުމަށް ފަހު ކަމަށް ވެސް މައުލޫމާތު ލިބެއެވެ.
Ads by STO
