ޕޯލްއާއި ކޯލްއަށް ފްރެންޑްސް ރިޔޫނިއަންގައި ބައިވެރި ނުވެވުނު ސަބަބަކީ މިއީ!
ފްރެންޑްސް ރިޔޫނިއަން ވެގެން ގޮސްފައި ވަނީ މިހާތަނަށް އެންމެ ގިނަމީހުން އިންތިޒާރު ކުރި ޝޯއަށެވެ. މިމަހުގެ 27ވަނަ ދުވަހުގެ ރޭ އެޗްބީއޯ އަދި އިންޑިޔާގެ ޒީ5 އިން ދައްކައިފައިވާ ފްރެންޑްސް ރިޔޫނިއަން ޝޯގައި ފްރެންޑްސް ޝޯގެ މުހިންމު ހުރިހާ ތަރިން ފެނިގެން ދިޔައިރު ފްރެންޑްސްގައި ރޮސްގެ ދަރިފުޅުގެ ރޯލް ކުޅުނު ޕޯލް ރަޑް އަދި ފީބީގެ ފިރިމީހާގެ ރޯލުން ފެނުނު ކޯލް ސްޕްރައުސް ފެނިފައި ނުވުމުން ބެލުންތެރިން ވަނީ ސުވާލު އުފައްދާފައެވެ.
ކޯލް ސްޕްރައުސް ނުވަތަ ފްރެންޑްސްގެ ނަމުން ނަމަ މައިކް ހެނިގަން އަދި ޕޯލް ރަޑް ނުވަތަ ބެން ގެލަރ، ފްރެންޑްސް ރިޔޫނިއަންއިން ނުފެނުނު ސަބަބާ ބެހޭ ގޮތުން ރިޔޫނިއަން ސްޕެޝަލް އެޕިސޯޑްގެ ޑައިރެކްޓަރ ބެން ވިންސްޓަން ބުނީ ހުރިހާ އެކްޓަރުންނާއި އެކްޓްރެސްއަށް ދައުވަތު އެރުވި ކަމަށާއި ބައެއް ތަރިންނަށް ނާދެވުނީ ކޮވިޑް ޕެންޑަމިިކްގެ ސަބަބުން ކަމަށެވެ.
"އަހަރުމެން ދައުވަތު ދިނިން ހުރިހާ ތަރިންނަށް ވެސް، އެކަމަކު މިއީ އުނދަގޫ ވަގުތެއް، ބައެއް ތަރިންނަށް ގައުމުން ބޭރަށް ދަތުރު ކުރެވޭކަށް ނެތް، ބައެއް ތަރިން އެހެން ޝޯތަކުގެ ޝޫޓިންގަ" ހުރިހާ ތަރިންނަށް ނާދެވުނު ސަބަބާ ބެހޭ ގޮތުން ވާހަކަ ދައްކަމުން ބެން ބުންޏެވެ.
އެހެން ނަމަވެސް ފްރެންޑްސްގެ މުހިއްމު ރޯލުތަކުން ފެނުން، ޖެނިފަރ އެނިސްޓަން، ކޯޓްނީ ކޮކްސް، ލިސާ ކުޑްރޯ، މެޓް ލެބްލަން، މެތިއު ޕެރީ،އަދި ޑޭވިޑް ސްޗްއިމަރ ވަނީ ރިޔޫނިއަން ޝޯއިން ފެނިގެން ގޮސްފައެވެ.
ފްރެންޑްސް - ދަ ރިޔޫނިއަންގައި އެކިއެކި ހާއްސަ މެހުމާނުން ބައިވެރިވެފައިވެއެވެ. މިގޮތުން ޑޭވިޑް ބެކަމް، ޖަސްޓިންް ބީބަރ، ބީޓީއެސް، ލޭޑީ ގާގާ އަދި މަލާލާ ޔޫސަފްޒާއި ފަދަ މަޝްހޫރު އެތައް ބައެއްގެ ފެނިލުން ވަނީ ފެނިފައެވެ.
