މިދިޔަމަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 64،500 އަށްވުރެ މައްޗަށް
ނިމުނު މޭމަހު ރާއްޖެއަށް ޒިޔާރަތްކޮށްފައި ވަނީ 64613 ފަތުރުވެރިންކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީގެ ތަފާސް ހިސާބުތަށްދައްކާގޮތުން މިއަހަރުގެ ފުރަތަމަ 5 މަސް ދުވަސްތެރޭ ރާއްޖެއަށް ވަނީ 454383 ފަތުރުވެރިން އައިިސްފައެވެ. ފާއިތުވި މަސްތަކާއި އަޅާ ބަލާއިރު، މިމަހުގެ މިހާތަނަށް ރާއްޖެއަށް ފަތުރުވެރިން އައިސްފައިވާ އަދަދު ދަށެވެ. އަދި އަހަރުގެ މިހާތަނަށް ރާއްޖެއަށް އެންމެ މަދުން ފަތުރުވެރިން އައިސްފައި ވަނީ މޭމަހުގެއެވެ.
އެހެންނަމަވެސް ޖުލައިމަހުގެ ތެރޭގައި އަނެއްކާވެސް ރާއްޖޭގެ ފަތުރުވެރިކަން ރަނގަޅުވާން ފަށާނެކަމަށް ޓޫރިޒަމް މިނިސްޓަރ އަބްދުﷲ މައުސޫމް ވަނީ ވިދާޅުވެފައެވެ.
ފާއިތުވި 5 މަސް ދުވަހު ރާއްޖެއަށް ފަތުރުވެރިން އައިސްފައިވާ އަދަދުތަކަށް ބަލާއިރު، މިއަހަރުގެ ޖެނުއަރީމަހު ރާއްޖެއަށް އައިސްފައިވަނީ 92103 ފަތުރުވެރިންނެވެ. ފެބްރުއަރީމަހު 96882 ފަތުރުވެރިން އައިސްފައިވާއިރު މަރޗުމަހު 109585 ފަތުރުވެރިން އަދި އޭޕްރީލްމަހު ރާއްޖެއަށް 91200 ފަތުރުވެރިން ވަނީ އައިސްފައެވެ. އަދި މި ނިމުނު މޭމަހު ރާއްޖެއަށް އައިސްފައިމިވަނީ 64613 ފަތުރުވެރިންނެވެ.
ކޯވިޑްގެ ނަންބަރުތައް ރާއްޖޭގައި މިފަހުން އިތުރުވާން ފެށުމާއިއެކު ބައެއް ސަރަޙައްދުތަކުން އަންނަ ފަތުރުވެރިންނަށް ވިޒާ ދިނުން ހުއްޓާލުމާއެކު ރާއްޖެ އަންނަ ފަތުރުވެރިންގެ އަދަދު ވަނީ މަދުވެފައެވެ.
