ކޮވިޑްގައި ކުޑަކުދިންވެސް ވަރަށް ބޮޑަށް ބަލިވާން ފަށައިފި- ޑރ. ފައިސަލް
ކޮވިޑްގެ ނުރައްކާތެރި ހާލަތަކަަށް ރާއްޖެ ގޮސްފައިވާ މި ދަނޑިވަޅުގައި ކޮވިޑް ޖެހޭ ކުޑަކުދިން ވެސް ވަރަށް ބޮޑަށް ބަލިވާން ފަށައިފިކަމަށް އައިޖީއެމްއެޗްގެ ކުޑަކުދިންގެ ޑޮކްޓަރު އަހްމަދު ފައިސަލް ވިދާޅުވެއްޖެއެވެ.
"މި ފަހަރުގެ ކޮވިޑު ރާޅުގައި ކުޑަކުދިން ވެސް ވަރަށް ވަރަށް ބަލިވާން ފަށައިފި. ޚާއްޞަކޮށް؛ ދިފާޢީ ނިޒާމްދަށް ކުދިން (ސުޓެރއިޑް ފަދަ ބޭހުން ވިޔަސް ނުވަތަ ކެންސަރު ނޫނީ އުފެދުމުގައި ހުންނަ ކަމަކުން ވިޔަސް) ކިޑްނީބަލި، ބަރުދަން މާމަތި (ކުދިންނާއި) އެނދުމަތިވެފައި ތިބޭ ކުދިން،" މާބޮޑަށް ބަލިވާން ފަށައިފި."ކޮވިޑް ޖެހޭ ކުޑަކުދިންނަށް ވެސް ފަރުވާ ދިނުމުގައި ހަރަކާތްތެރިވާ ޑޮކްޓަރު ފައިސަލް ކުރެއްވި ޓްވީޓެއްގައި ވިދާޅުވިއެވެ.
ރާއްޖޭގައި ކޮވިޑް ޖެހޭ މީހުންގެ އަދަދު އިންތިހާއަށް އިތުރު ވެފައިވާ މިދަނޑިވަޅުގައި ޑރ. ފައިސަލް މިހެންވިދާޅުވުމުން މީހަކު ވަނީ އެއީ އާވެރިންޓްގެ ސަބަބުން ދިމާވާ ކަމެއްތޯ ސުވާލު ކޮށްފައެވެ. އެސުވާލުގެ ޖަވާބުގައި ޑޮކްޓަރ ފައިސަލް ވިދާޅުވީ އެކަން އެނގޭނީ ޓެސްޓް ކުރުމުން ކަމަށެވެ.
ކޮވިޑް 19ގައި ކުޑަކުދިން ވަރަށް ބަލިވާކަމަށް ޑރ. ފައިސަލް ވިދާޅުވެފައި ވަނިކޮށް ކޮވިޑް 19ގައި ރޭ ވަނީ ކުޑަ ކުއްޖެއް ނިޔާވެފައެވެ. ކޮވިޑް ޖެހި ހޯމް ކަރަންޓީނުގައި ހުރި އެކުއްޖާގެ ނިޔާވީ ހާލު ދެރަވެގެން ހޮސްޕިޓަލަށް ގެންގޮސް ވެންޓިލޭޓަރގައި ފަރުވާ ދެމުންދަނިކޮށް ރޭ ދަންވަރުގެ ވަގުތެއްގައެވެ.
