އެމްބިއުލާންސް ލަސްވެ، ކުއްޖާ ނިޔާވި މައްސަލަ ބަލަން ފަށައިފި
އެމްބިއުލާންސް ލަސްވެ މިއަދު ނިޔާވި ކުއްޖާގެ މައްސަލަ ހެލްތު މިނިސްޓްރީން ބަލަން ފަށައިފިއެވެ.
މިކަން ހާމަކޮށްފައި ވަނީ ހެލްތު މިނިސްޓްރީން ދެންމެ ކުރެއްވި ޓްވީޓެއްގައެވެ.
އެ މިނިސްޓްރީން މިކަން ހާމަކޮށްފައި ވަނީ ، ކޮވިޑް ބަލީގައި މާލޭ ސިޓީގައި ރޭ ނިޔާވި ހދ. ކުޅުދުއްފުށީ ސިޓީއަށް ނިސްބަތްވާ 10 އަހަރުގެ ކުއްޖާގެ ހާލު ގޯސްވެގެން ގުޅުމުން އެ ކުއްޖާ ހޮސްޕިޓަލަށް ގެންދަން އެމްބިއުލާންސަށް ދެވުނީ، ޢާއިލާއިން ގުޅިތާ 2 ގަޑިއިރާއި 40 މިނެޓްފަހުން ކަމަށް އާއިލާއިން ބުނެފައި ވަނިކޮށެވެ.
އެ ކުއްޖާގެ އާއިލާގެ މީހަކު މީސް މީޑިޔާގައި ހިއްސާކުރި ޕޯސްޓެއްގައި ބުނެފައި ވަނީ ކުއްޖާގެ ހާލަތު ގޯސްވާތީވެ ތަކުރާރުކޮށް އެޗްޕީއޭގެ ނަމްބަރު 1676އަށް ގުޅަމުންދިޔަ ކަމަށެވެ. އެހެން ނަމަވެސް ދެމުން ދިޔައީ އެއް ޖަވާބެއް ކަމަށާއި އެއީ މެޑިކަލް ޓީމަށް އަންގާފައިވާނެ ކަމަށާއި އިރުކޮޅެއް ތެރޭގައި އެމްބިއެލާންސް ދާނެ ކަމަށެވެ.
މިކަމާ ގުޅިގެން ހެލްތް މިނިސްޓްރީން ބުނީ މި މައްސަލައާ ގުޅިގެން ބަލަން ޖެހޭ ކަންތައްތައް މިހާރު ބަަލަމުންދާކަމަށެވެ. އަދި މި މައްސަލަ ރިވިއު ކުރަމުން އަންނަ ކަމަށާއި މިކަން ހިނގި ގޮތް ބަލައި ތަކުރާރު ވިޔަ ނުދިނުމަށް ވަގުތުން ފިޔަވަޅު އަޅަމުން އަންނަ ކަމަށެވެ.
