މިޝްކާގެ މަރު: ކޯލް ސެންޓަރުގެ ފަރުވާ ކުޑަކަމާއެކީ ބޮޑު އިހުމާލެއް!
ކޮވިޑް-19ގައި ނިޔާވި އުމުރުން 10 އަހަރުގެ މިޝްކާ ނިޔާވުމުގައި ކުއްޖާގެ ހާލަތުގެ ސީރިއަސްކަމާއި އެހީއަށް ބޭނުންވެފައިވާ އަވަސް މިންވަރު ކޯލް ސެންޓަރަށް ބެލިފައި ނުވާކަމަށް މިރޭ ހެލްތު މިނިސްޓްރީން އާންމުކުރި އިހުމާލު ރިޕޯޓުގައި ބުނެފިއެވެ.
ހެލްތް މިނިސްޓްރީން މިރޭ އާންމުކުރި އިހުމާލު ރިޕޯޓްގައި ކަން ހިނގައިދިޔަ ގޮތް ބަޔާންކޮށްފައި ވެއެވެ. އެ ހާދިސާއާ ގުޅިގެން މިހާތަނަށް ފާހަގަކުރެވުނު ކަންތައްތަކުގެ ތެރޭގައި ޞިއްޙީ ޚިދުމަތް ފޯރުކޮށްދިނުމުގައި އެއީ އިމަރޖެންސީ ހާލަތެއްކަމުގައި ބެލިފައި ނެތުމާއި އެފަދަ ހާލަތެއްގައި އަމަލުކުރަންޖެހޭ ގޮތަށް ޢަމަލުކޮށްފައި ނެތުމާއި އެމްބިއުލަންސް ޓްރިގަރ ކުރަންޖެހޭ ވަގުތުގައި އެކަންކޮށްފައި ނުވާކަން ފާހަގަ ކޮށްފައި ވެއެވެ.
އަދި އިމަރޖެންސީއެއްގެ ގޮތުގައި ރިޕޯޓް ކުރެވުނު ހިސާބުން އެމްބިއުލަންސް އެކްޓިވޭޓް ނުކުރެވި 2 ގަޑިއިރާއި 26 މިނެޓް ހޭދަވެފައިވާކަމަށް ވެސް ރިޕޯޓްގައި ވެއެވެ.
މީގެ އިތުރުން އެއީ އިމަރޖެންސީ ހާލަތަކަށް ވީހިނދު، އަދި ޑީ.އެމް.އާރ.ޓީއާއި ސީ.މެޓަށް އެމަޢުލޫމާތު ހިއްސާކުރެވި އަމަލުކުރަން ޖެހޭ އުސޫލުތަކާ އެއްގޮތަށް އެމްބިއުލަންސް ފޮނުވަން އަންގާފައި ނުވާ ކަމަށާއި މިކަމާ ގުޅިގެން ލިބިފައިވާ ކޯލް ލޮގްތަކަށް ބަލާއިރު، ކުއްޖާގެ ހާލަތުގެ ސީރިއަސްކަމާއި އެހީއަށް ބޭނުންވެފައިވާ އަވަސް މިންވަރު ކޯލް ސެންޓަރަށް ބެލިފައި ނުވާކަމަށް އެ ރިޕޯޓްގައި ވެއެވެ.
މީގެ އިތުރުން އިމަރޖެންސީ މެޑިކަލް ސަރވިސް (ބީއެމްއެސް)އަށް މަޢުލޫމާތު ލިބި ވަގުތުން އެމްބިއުލަންސް އެކްޓިވޭޓްކޮށް، 10 މިނެޓް ތެރޭގައި ކުއްޖާ ހޮސްޕިޓަލަށް ގެންދެވިފައިވާކަމަށް ވެސް އެ ރިޕޯޓުގައި ބުނެފައިވެއެވެ.
Ads by STO
