މާލޭގެ ޑެޕިއުޓީ މޭޔަރަކު އިންތިޚާބު ކުރުން މިމަހު 21ގައި
މިހައިތަނަށް ޑެޕިއުޓީ މޭޔަރު އިންތިޚާބުކޮށްފައި ނުވާ ހަމައެކަނި ސިޓީ، މާލޭ ސިޓީގެ ޑެޕިއުޓީ މޭޔަރު މިމަހު 21 ވަނަ ދުވަހު އިންތިހާބުކުރަން ނިންމައިފިއެވެ.
މި ދައުރަށް އިންތިޚާބުވި ކައުންސިލަރުން ހުވާކޮށްފައި ވަނީ މެއި މަހުގެ 17 ވަނަ ދުވަހު އޮންލައިންކޮށް ބޭއްވި ޖަލްސާއެއްގައެވެ.
ޑެޕިއުޓީ މޭޔަރު އިންތިހާބުކުރަން ޖެހެނީ ކައުންސިލަރުންގެ މެދުގައި ނަގާ ސިއްރު ވޯޓަކުންނެވެ، އަދި ހުވާ ކުރި ދުވަހު ޑެޕިއުޓީ މޭޔަރުގެ ވޯޓު ނަގައިފައި ނުވަނީ އޮންލައިންކޮށް ޖަލްސާ ކުރިޔަށް ގެންދިއުމުގެ ސަބަބުންނެވެ.
މާލެ ސިޓީ ކައުންސިލުން މިދިޔަ އާދީއްތަ ދުވަހު 14 ދުވަހުގެ ނޯޓިސް ދިނުމަށްފަހު ކައުންސިލަރުންނަށް ފޮނުއްވި ސިޓީގައި ވަނީ ޑެޕިއުޓީ މޭޔަރަކު އިންތިޚާބުކުރުމަށް ބާއްވާ ޖަލްސާ މިމަހުގެ 21 ގައި އޮންނާނެ ކަމަށެވެ.
މާލެ ސިޓީގެ ޑެޕިއުޓީ މޭޔަރުކަމަށް ޕީޕީއެމްގެ ހަތަރު ކައުންސިލަރަކު ވަނީ ޝައުގުވެރިކަން ފާޅުކޮށްފައެވެ. މާލެ ސިޓީ ކައުންސިލްގައި ހިމެނިވަޑައިގަންނަވާ 19 މެންބަރުންގެ ތެރެއިން 12 މެންބަރުންނަކީ ޕީޕީއެމްގެ މެންބަރުންނެވެ.
