މި ފަސް އަހަރު އޮންނަން ޖެހޭނީ ރިޔާސީ ނިޒާމު، ސަރުކާރަށް އެއްބާރުލުން ދޭނަން: ބިގޭ
މި ފަސް އަހަރު ދުވަހު އޮންނަން ޖެހޭނީ ރިޔާސީ ނިޒާމު ކަމަށާއި މި ނިޒާމުގެ ތެރެއިން ސަރުކާރު ހިންގުމަށް ފުރިހަމަ އެއްބާރުލުން ދެއްވާނެ ކަމަށް އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ބިގޭ ވިދާޅުވީ ފަސް އަހަރު ދުވަހުގެ ވެރިކަމަށް ރިޔާސީ ނިޒާމުގެ ތެރެއިން ރައްޔިތުން ރައީސުލްޖުމްހޫރިއްޔާގެ މަގާމަށް ބޭފުޅަކު އިންތިޚާބު ކޮށްފައިވާ ކަމަށެވެ. އެހެންކަމުން މި ފަސް އަހަރު ދުވަހުގެ ތެރޭގައި ރައްޔިތުން ބޭނުންވާ ތަސައްވުރު ތަންފީޒު ކުރެވޭނީ ރިޔާސީ ނިޒާމުގެ ތެރެއިން ކަމުގައި އޭނާ ފާހަގަ ކުރެއްވިއެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުން ބިގޭ އިތުރަށް ވިދާޅުވީ ރައްޔިތުންގެ މަޖިލީހުންނާއި، އެމްޑީޕީގެ ތެރެއިން ދެވެން އޮތް ހުރިހާ އެއްބާރުލުމެއް ދޭނެކަމުގެ ޔަގީންކަން ދެއްވާ ކަމަށެވެ. އަދި މި ފަސްއަހަރު ކުރިއަށް ދާން ޖެހޭނީ ރިޔާސީ ނިޒާމުގެ ތެރެއިންކަން ފާހަގަ ކުރައްވަމުން ބިގޭ ވިދާޅުވީ ސަރުކާރަށް އެއްބާރުލުން ދޭން ޖެހޭ ކަމަށެވެ.
ބިގޭ އިތުރަށް ވިދާޅުވީ ރާއްޖެއަށް ކަމުދަނީ ކޮން ނިޒާމެއްތޯ ކަނޑައެޅުމުގައި ވަގުތާއި ހާލަތަށް ބަަލަން ޖެހޭ ކަމަށާއި މިހާރުގެ ހާލަތުގައި ބޮޑަށް ފައިދާ ކުރާނީ ރިޔާސީ ނިޒާމުގައި ކަމަށެވެ. އޭނާ ވިދާޅުވީ އޭނާ އަބަދުވެސް ނިންމަނީ އެ ވަގުތަކަށް ގައުމަށް ފައިދާ ހުރި ގޮތް ކަމުގައެވެ.
ބިގޭ ވިދާޅުވީ ބަރުލަމާނީ ނިޒާމެއްގައި މިނިސްޓަރުންގެ ގޮތުގައި ތިއްބަވާނީ މަޖިލިސް މެންބަރުން ކަމަށާއި މާޒީގައި ހިނގައިފައިވާ ކަންކަމުން އިބުރަތް ހާސިލުކޮށް ކަންކަން ނިންމަން ޖެހޭ ކަމަށެވެ.
ބަރު ކުރާކަށް ބޭނުމެއް ނޫން. ޢެއްގޮތަކަށްވެސް.