ގަމުން މީހަކު ފައްސި ނުވާތާ ދެ ދުވަސް، ބަލި ޖެހުނު މީހުންގެ ހާލު ވެސް ރަނގަޅު
ހަލުވިކަމާ އެކު ކޮވިޑް-19 ފެތުރެމުން ދިޔަ ލ. ގަމުން މި ބައްޔަށް އެއްވެސް މީހަކު ފައްސި ނުވާތާ މިއަދަށް ދެ ދުވަސް ވެއްޖެއެވެ.
ގަމު ރީޖަނަލް ހޮސްޕިޓަލުގެ މެނޭޖަރ އަލީ ނަޝީދު "ދެން" އަށް މައުލޫމާތު ދެއްވަމުން ވިދާޅުވީ ގަމުން އިތުރު މީހަކު ފައްސި ނުވާތާ ދެ ދުވަސް ވެފައިވީ ނަމަވެސް، އެ ރަށް އަދިވެސް އޮތީ މޮނީޓަރިންގެ ހާލަތުގައި ކަމަށެވެ.
"އިތުރު ބަދަލެއް އަދި ނާދޭ، ދެ ދުވަސް ވެއްޖެ ފައްސި ކޭސްއެއް ނުފެންނަތާ. އެކަމަކު އިއްޔެ އެއީ އެހާ ގިނަ ސުންކުގެ ނަތީޖާއެއް ވެސް ނޫން" ނަޝީދު ވިދާޅުވިއެވެ.
މީގެއިތުރުން ގަމު ހޮސްޕިޓަލުގެ މެނޭޖަރ ވިދާޅުވީ ދެ ސުންކުގެ ނަތީޖާ އަދި ނުލިބޭ ކަމަށެވެ.
ކޮވިޑާ ގުޅިގެން ރަށުގެ އާންމު ހާލަތު އަދިވެސް އޮތީ މޮނީޓަރިންގައި ކަމަށާއި ކާފިއު ގަޑިތަކުގައި ކާފިއު ކުރިއަށްދާނެ ކަމަށް ވެސް ނަޝީދު ވިދާޅުވިއެވެ.
"ފައްސި ކޭސްއެއް ނުފެނި ދިޔުމަކީ އާންމު ހާލަތު ރަނގަޅުވުން ކަމަކަށް ނުބެލެވޭނެ އަޅުގަނޑުމެންނަކަށް. ފަންސާހަށް ވުރެ ގިނަ އެކްޓިވް ފައްސި ކޭސް އަދިވެސް އެބަހުރި މި ރަށުގައި" ނަޝީދު ވިދާޅުވިއެވެ.
ގަމު ރީޖަނަލް ހޮސްޕިޓަލުގެ މެނޭޖަރ އިތުރަށް ވިދާޅުވީ ފައްސި މީހުންގެ ތެރެއިން މިވަގުތު ފެސިލިޓީގައި ވެސް ގަމުގެ މީހެއް ނެތް ކަމަށާއި އެންމެންގެ ހާލު ވެސް މި ވަގުތު ރަނގަޅު ކަމަށެވެ.
ރާއްޖޭގައި ކޮވިޑް-19 ޖެހޭ މީހުންގެ އަދަދު މަދުވަމުން ދިޔަ ނަމަވެސް މިހާލަތުގައި ފަރުވާ ކުޑަކޮށްނުލުމަށް ސިއްހީ މާހިރުން ދަނީ ލަފާ ދެމުންނެވެ. އަދި ފައްސިވާ މީހުންގެ އަދަދު މަދުވި ނަމަވެސް ފަރުވާ ކުޑަކޮށްފި ނަމަ އިތުރު ރާޅެއް އަރާނެ ކަމުގެ ބިރު އެބައޮތް ކަަމަށް ސިއްޙީ މާހިރުން ވިދާޅުވެއެވެ.
ގަމުން މިހާތަނަށް 322 މީހަކު ވަނީ ކޮވިޑަށް ފައްސިވެފައެވެ. އަދި މީގެ ތެރެއިން 263 މީހަކު ބަލިން ރަނގަޅުވެފައިވާ އިރު، 2 މީހަކު ވަނީ ބަލީގައި ނިޔާވެފައެވެ. މިވަގުތު އެރަށުގައި ބަލި ޖެހިފައިވާ 57 މީހަކު އެބަ ތިއްބެވެ. ބޮޑު އާބާދީއެއް އޮންނަ ގަމުން މިހާތަނަށް 2861 ސުންކު ނަގައި ޓެސްޓްކޮށްފައިވެއެވެ.
ގަމުން ފުރަތަމަ ކޮވިޑް-19 ފައްސި ވޭދަނައެއް ފެނިފައި ވަނީ އޭޕްރީލް މަހުގެ 24 ވަނަ ދުވަހުއެވެ. އެއީ އެ ރަށާ އެއްފަސްކޮށް އޮންނަ މާންދޫން ފެނުނު ކޮވިޑް-19ގެ ވޭދަނައާ ގުޅުން ހުރި މީހެކެވެ. އޭގެ ފަހުން އެރަށުން އިތުރު ކްލަސްޓަރތަކެއް ވަނީ ފެނިފައެވެ. ނަމަވެސް ރަށުގައި ބޮޑަށް ފެތުރުނީ މާންދޫ ކްލަސްޓަރއާ ގުޅުން ހުރި ވޭދަނަތަކެއް ކަން ނަޝީދު ފާހަގަ ކުރެއްވިއެވެ.
ގަމުގައި މިހާރު ހަވީރު 4 އިން ފެށިގެން ފަތިހު 4އަށް ކާފިއު ހިންގައެވެ. މިވަގުތުތަކުގައި ބޭރުގައި އުޅޭ ފަރާތްތައް ހުއްޓުވުމަށް އެ ރަށުގައި ފުލުހުން ވެސް ހަރަކާތްތެރިވެއެވެ.
