ކޮމިޓީއެއް ސިއްރުކުރަން ވާނީ ގައުމީ ސަލާމަތަށް ނުރައްކާ އޮތްނަމަ: މީކާއީލް
ރައްޔިތުންގެ މަޖިލީހުގެ ކޮމިޓީއެއް ސިއްރުކުރަން ނިންމަން ވާނީ ގައުމީ ސަލާމާތަށް ނުރައްކާވެދާނެ ފަދަ ދައުލަތުގެ ސިއްރެއް ހާމަވެދާނެ ފަދަ ނޫނީ ފަރުދެއްގެ ޒާތީ މައުލޫމާތު ހާމަވެދާނެ ފަދަ ހާލަތެއް އޮވެއްޖެނަމަކަމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމިޓީން 6 ޖޫން 2021 ވަނަ ދުވަހުގެ ރޭ ބޭއްވި ކޮމިޓީގެ 7 ވަނަ ބައްދަލުވުމުގައި ނެގުނު ވޯޓާ ގުޅޭގޮތުން ނެރުނު ނޫސް ބަޔާނެއް ރީޓްވީޓް ކުރައްވާ މީކާއިލް ވިދާޅުވީ ކޮމިޓީ ސިއްރު ކުރަންވާނީ ގައުމީ ސަލާމާތަށް ނުރައްކާވެދާނެ ފަދަ، ދައުލަތުގެ ސިއްރެއް ހާމަވެދާނެ ފަދަ ނޫނީ ފަރުދެއްގެ ޒާތީ މައުލޫމާތު ހާމަވެދާނެ ފަދަ ހާލަތެއް އޮވެއްޖެނަމަ ކަމަށާއި އެ ނޫން ގޮތެއްގައި ކޮމިޓީ ސިއްރުކުރާ ނަމަ އެއީ އަމިއްލަ އެޖެންޑާއެއް ފޮރުވުމަށް ކުރާ ކަމެއް ކަމަށެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް އައިއީޑީއެއް ގޮއްވައިލައި ދިން ޓެރަރިސްޓު ހަމަލައާ ގުޅިގެން، ރައްޔިތުންގެ މަޖިލީހުގެ ގައުމީ ސަލާމަތީ ހިދުމަތްތަކާ ބެހޭ ކޮމިޓީ (24 ކޮމިޓީ) އިން ވަނީ ހާއްސަ އިންކުއަރީއެއް ފަށައިފައެވެ. މި އިންކުއަރީއާ އެކު އެމްޑީޕީގެ އެތެރޭގެ ހަމަނުޖެހުންތައް ވަނީ ބޮޑުވެފައެވެ.
މިއާއެކު ޕާޓީ ދެބައިވެފައިވާކަމަށް ޕާޓީގެ ޗެއަރ ޕާސަން ހަސަން ލަތީފްވެސް ވަނީ ވިދާޅުވެފައެވެ. އަދި ޕާޓީ ދެބައިވީ ވައުދުވީ ކަންކަން ކުރަން ސަރުކާރުން ބޭނުން ނުވުމުންކަމަށް ހަސަން ލަތީފް ވިދާޅުވިއެވެ.
މަޖިލީހުގެ އިމްތިޔާޒާއި ސުލޫކު ކޮމިޓީން 6 ޖޫން 2021 ވަނަ ދުވަހުގެ ރޭ ބޭއްވި ކޮމިޓީގެ 7 ވަނަ ބައްދަލުވުމުގައި ނެގުނު ވޯޓުގެ ސްކްރީން ޝޮޓެއް ލީކް ކޮށްލުމާ އެކު މެމްބަރުންނަށް ފުރައްސާރައާއި އިންޒާރުތައް ލިބެމުންދާކަމަަށް އެކޮމިޓީން އާއްމުކުރި ނޫސްބަޔާނުގައި ވަނީ ވިދާޅުވެފައެވެ.
Ads by STO
