ކުޑަކުދިންގެ ހިޔާގައި ހުރި ކުއްޖެއް އެތަނުން ބޭރަށް ގެންގޮސް ޖިންސީގޯނާކޮށްފި

ދައުލަތުގެ ބެލުމުގެ ދަށުގައި ކުޑަކުދިންގެ ހިޔާގައި ހުރި ކުޑަކުއްޖަކު ހައްލާލައިގެން އެކުއްޖާ ކުޑަކުދިންގެ ހިޔާ އިން ބޭރަށް ގެންގޮސް ޖިންސީ ގޯނާކުރިކަމަށް ތުހުމަތު ކުރެވޭ މައްސަލައެއްގައި 25 އަހަރުގެ ދިވެހި ފިރިހެނެއް ހައްޔަރުކޮށްފިއެވެ.

Ads by STELCO

މައުލޫމާތު ލިބިފައިވާގޮތުގައި ޖިންސީ ގޯނާގެ ތުހުމަތުގައި މަހުގެ 12 ވަނަ ދުވަހު އެމީހާ ހައްޔަރުކޮށް، ބަންދަށް ކްރިމިނަލް ކޯޓުން ވަނީ 10 ދުވަސް ޖަހައިފައެވެ.

އެކުއްޖާއަށް ޖިންސީ ގޯނާކޮށްފައި ވަނީ ހައްލާލައިގެން ކަމަށާއި އެކަމުގެ ހެކި ފުލުހުންނަށް ހުށައަޅައިފައިވާ ކަމަށް ވެސް މައުލޫމާތު ލިބިފައި ވެއެވެ. މިމައްސަލައިގައި ހައްޔަރުކޮށްފައިވާ މީހާއަކީ މަސްތުވާތަކެތި ބޭނުންކުރުމާއި މާރާމާރީގެ ކުށުގެ ރެކޯޑު އޮންނަ މީހެއް ކަމަށް ފުލުހުން ވަނީ ބުނެފައެވެ.

ދައުލަތުގެ ބެލުމުގެ ދަށުގައި ހުރި ކުޑަކުއްޖަކަށް ޖިންސީ ގޯނާކޮށްފައިވާއިރު، ދިވެހި އަންހެން ޓީޗަރަކު އޭނާގެ 16 އަހަރުގެ ފިރިހެން ދަރިވަރަކަށް ޖިންސީ ގޯނާކުރި މައްސަލައެއް ވެސް މިދިޔަ ހަފްތާތެރޭގައި ފުލުހުންނަށް ވަނީ ހުށައަޅައިފައެވެ. މި މައްސަލަ ފެންމަތިވުމާ އެކު އެ ޓީޗަރުގެ ފަރާތުން އެހެން ދަރިވަރުންނަށް ވެސް ޖިންސީ ގޯނާ ލިބިފައިވާ ކަމަށް ބެލެވޭ މައްސަލައެއް ފުލުހުން ވަނީ ބަލަން ފަށައިފައެވެ.

އެމައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައިވާކަމުގެ މައުލޫމާތެއް ލިބިފައެއް ނުވެއެވެ. އެހެން ނަމަވެސް އެމައްސަލައިގައި ތުހުމަތު ކުރެވޭ ޓީޗަރު ހުރީ ސަސްޕެންޑްކޮށްފައިކަމަށް އެޑިއުކޭޝަން މިނިސްޓްރީއިން ވަނީ ބުނެފައެވެ.