އަލީ ވަހީދުގެ ޕާސްޕޯޓު ހިފަހައްޓަން ޕީޖީއިން އަނެއްކާ ވެސް އެދިއްޖެ
ޖިންސީ ގޯނާގެ ތުހުމަތު އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ހިފަހައްޓަން ޕްރޮސެކިއުޓާ ޖެނެރަލް (ޕީޖީ) އޮފީހުން އަނެއްކާ ވެސް އެދިއްޖެއެވެ.
އަލީ ވަހީދުގެ ޕާސްޕޯޓު ހިފަހައްޓައި، ފުރުން މަނާ ކުރަން ފުލުހުންގެ ކިބައިން އެދިފައިވާކަން ޕްރޮސެކިއުޓާރ ޖެނެރަލް އޮފީހުގެ ސްޕޯކްސްޕާސަން އަދި ޕަބްލިކް ޕްރޮސެކިއުޓާ އަހުމަދް ޝަފީއު ވަނީ ކަށަވަރު ކޮށްދެއްވައިފައެވެ.
"ފުލުހުންގެ ކިބައިން ވާނީ އަލީ ވަހީދުގެ ޕާސްޕޯޓު ހިފެހެއްޓުމުގެ އަމުރަކަށް އެދުމަށް އެދިފަ،" ޝަފީއު ވިދާޅުވިއެވެ.
މީގެ އިތުރުން ޝަފީއު ވިދާޅުވީ، ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމުގެ ނަތީޖާއަކީ އެ ޕާސްޕޯޓް ބޭނުންކޮށްގެން މިވަގުތު އޭނާ ހުންނެވި އިނގިރޭސިވިލާތުން އެހެން ގައުމަކަށް ދަތުރުކުރިޔަ ނުދިނުން ކަމަށާއި އަދި ޕީޖީ އޮފީހުން އުންމީދު ކުރަނީ އެ ހާލަތުގައި އަލީ ވަހީދަށް އެނބުރި ދަތުރުކުރެވޭނީ ހަމައެކަނި ދިވެހި ރާއްޖެއަށްވުން ކަމަށެވެ.
ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތު އުފުލިފައިވާ އަލީ ވަހީދުގެ ޕާސްޕޯޓު އެންމެ ފުރަތަމަ ހިފެހެއްޓީ މިދިޔަ އަހަރުގެ ޖުލައި މަސް ތެރޭގައެވެ. ނަމަވެސް ބޭސް ފަރުވާއަށް ރާއްޖެއިން ބޭރަށް ވަޑައިގަންނަވަން އެދިލެއްވުމުން، ކްރިމިނަލް ކޯޓުން މިދިޔަ ފެބްރުއަރީ މަހު އަލީ ވަހީދުގެ ޕާސްޕޯޓު ދޫކޮށްފައި ވަނީ، ޕީޖީ އޮފީހުން ، އޭނާގެ ޕާސްޕޯޓް ދޫނުކޮށް ޓްރެވެލް ޑޮކިއުމެންޓްއެއްގެ ދަށުން ފުރަން ހުއްދަ ދިނުމަށް ކޯޓުގައި އެދިފައި ވަނިކޮށެވެ.
