ބޮލީވުޑް ސްކްރީން: ރާކީ މިހާރު ބޭނުން ވަނީ ބިސްތައް ގަނޑުފިލުވައިގެން މަންމައަކަށް ވާން!
ބޮލީވުޑްގައި މިއަދު ފާހަގަ ކޮށްލެވޭ ޚަބަރުތަކަށް ބަލާއިރު، މިއަދު ވެސް ވަރަށް ތަފާތު ޚަބަރުތަކެއް މިވަނީ ފެނިފައެވެ.
މިއަދުގެ ޚަބަރުތައް ފަށާނީ، އިންޑިއާގެ މަޝްހޫރު އައިޓަމް ގާލް ރާކީ ސާވަންތުގެ ޚަބަރަކުންނެވެ.
ރާކީ މިހާރު ބޭނުން ވަނީ ބިސްތައް ގަނޑު ފިލުވައިގެން، މަންމައަކަށް ވާން!
ބައެއް ފަހަރު އޭނާ އުޅޭ ގޮތާ ހެދި މީހުން އޭނާ ދެކެ ރުޅި ވެސް އާދެއެވެ. އޭނާ ދެކެ ރުޅިއަޔަސް އަދި އުފާ ވިޔަސް، ޔަގީންވާ އެއް ކަމަކީ އެއްވެސް މީހަކަށް ރާކީ މަތިން ހަނދާން ނުވެ ނުހުންނާނެ ކަމެވެ. ދުވަސްދުވަސްކޮޅުން އޭނާގެ ޚަބަރުތައް ފެންމަތި ވަނީ ވެސް އެހެންވެއެވެ.
އިންޑިއާގެ މީޑިއާއަކަށް ދިން އިންޓަވިއުއެއްގައި ރާކީ ބުނީ އޭނާ ވެސް ހުންނަނީ ދަރިމައިވުމުގެ ބިސްތައް ގަނޑު ކޮށްފައި ކަމަށެވެ. ބޮލީވުޑްގެ ގިނަ ތަރިން އެކަން ކުރަނީ މަންމައަކަށް ވުމުގެ ކުރިން ގިނަ ދުވަހު މަސައްކަތް ކުރަން ވެގެން ކަމަށް ވެސް ރާކީ ބުންޏެވެ.
ރާކީ ބުނީ މަންމައަކަށް ވާން މިހާރު އޭނަ ތައްޔާރު ކަމަށެވެ. އެހެންކަމުން ވަރަށް އަވަހަށް ބިސްތައް ގަނޑު ފިލުވާނެ ކަމަށެވެ. މިދުވަސްކޮޅު އޮތް މައްސަލައަކީ ރާކީގެ ފިރިމީހާ ރިތޭޝް އޭނަ ގާތުގައި ނެތުން ކަމަށާއި އަވަހަށް ފިރިމީހާ ނައިސްފިނަމަ އެކަމާ މެދު ވެސް ގޮތެއް ނިންމަން ޖެހޭނެ ކަމަށެވެ.
ފިރިމީހާގެ މަރަށްފަހު މަންދިރާ ގެ ވިއްކައިލަނީ
އިންޑިއާގެ މަޝްހޫރު ޓެލެވިޝަން އެކްޓްރެސް އަދި ހޯސްޓު މަންދިރާ ބޭދީގެ ފިރިމީހާ ރާޖް ކޯޝަލް ހާޓްއެޓޭކެއް ޖެހިގެން މަރުވީ މިދިޔަ ބުދަ ދުވަހުގެ ހެނދުނުގެ ވަގުތެއްގައެވެ. ރާޖްގެ ޖަނާޒާއަށް ދިޔައީ އޭނާގެ އާއިލާމީހުންނާއި ގާތް ރަހުމަތްތެރިން އެކަނި ކަމަށް ރިޕޯޓުތަކުން ބުނެއެވެ.
ފިރިމީހާގެ މަރަށް ފަހު މަންދިރާ މިހާރު ވަނީ އެ ދެ މީހުން ގަތް "މަދް އައިލެންޑް ވިލާ" ވިއްކާލަން އެއާބީއެންބީގައި ޖަހައިފައެވެ.
މަންދިރާ އެ ގެ ގަތް ފަހުން މިހާރު 15 އަހަރު ވެފައިވެއެވެ.
އެ ގެއަކީ ރީތި ފަރުނީޗަރުތަކާ، ސްވިމިންގް ޕޫލެއް ވެސް ހިމެނޭ ގެއެކެވެ. ރިޕޯޓުތަކުން ބުނާ ގޮތުގައި އެ ގެ ގިނައިން ބޭނުން ކޮށްފައި ވަނީ އެކި ފިލްމުތަކުގެ މަސައްކަތަށެވެ.
ގެ ވިއްކާލަން މަންދިރާ އިއުލާނު ކޮށްފައިވީ ނަމަވެސް، މިއީ ކޮން ސަބަބަކާ ހެދި އޭނާ ނިންމި ނިންމުމެއް ކަމަކަށް ބުނެފައެއް ނުވެއެވެ.
ޝާހިދު މާސްކު ނަގައިފި، ބޭނުންވަނީ ގެއަށް ދާން
އިންސްޓަގްރާމްގައި ޝާހިދު ކަޕޫރް ހިއްސާ ކުރި ވީޑިއޯއެއްގެ ކެޕްޝަންގައި ބުނެފައި ވަނީ އޭނާއަށް މަސައްކަތް ކުރެވިއްޖެ ކަމަށާއި މާސްކު ނަގަނީ ކަމަށެވެ. އަދި އޭނާ ބޭނުން ވަނީ ގެއަށް ދާން ކަމަށް ވެސް ބުނެފައިވެއެވެ.
ބެލެވޭ ގޮތުގައި މިއީ ކުޑަ އިޝްތިހާރެއްގެ ވީޑިއޯ ކޮޅެކެވެ. އެ ވީޑިއޯއިން ފެންނަނީ ފިލްމީ އެކިއެކި މަސައްކަތްތައް ނިންމައިލުމަށް ފަހު ގެއަށްދާން ތައްޔާރުވާ މަންޒަރެވެ. ދިޔުމުގެ ކުރިން އޭނާ ގަޔަށް ސެންޓު ޖަހާ މަންޒަރު ވެސް ފެނެއެވެ. އެހެންކަމުން ބޮޑަށް ހީވަނީ ޝާހިދު ހިއްސާ ކޮށްފައި މިވަނީ އެ ސެންޓުފުޅީގެ އިޝްތިހާރުގެ ބައެކެވެ.
