ސަރުކާރުގެ މެޖޯރިޓީ އޮތީ ވާދަވެރި ޕާޓީތަކުގެ އަތް ދަށުގައި: ދޮން ބިލަތް
ދިވެހި ސަރުކާރު މިއަދު ހިންގަމުން އަންނަނީ ކޯލިޝަނަކުން ކަމަށާއި އެމްޑީޕީއަށް އޮތީ ސަރުކާރުގެ 40 އިންސައްތަ ކަމަށް އަދި ސަރުކާރުގެ މެޖޯރިޓީ 60 އިންސައްތަ އޮތީ ވާދަވެރި ޕާޓީތަކުގެ އަތް ދަށުގައި ކަމަށް ރައްޔިތުން މަޖިލީހުގެ ބިލެތްދޫ ދާއިރާގެ މެންބަރު އަހުމަދު ހަލީމް (ދޮން ބިލަތް) ވިދާޅުވެއްޖެއެވެ.
ރައީސް ނަޝީދަށް އަމާޒުކޮށް މެއި ހަވަނަ ދުވަހު ދިން ނިރުބަވެރި ހަމަލާގެ ތަޙްޤީޤް ކުރިޔަށްދާ ސްޕީޑާ ބެހޭ ގޮތުން މިރޭ ސަންގު ޓީވީގެ ޚަބަރަށް ފަހު ޕްރޮގްރާމްގައި ވާހަކަފުޅު ދައްކަވަމުން ދޮން ބިލަތް ވިދާޅުވީ، އެމްޑީޕީގެ މެޖޯރިޓީ އޮތް ސަރުކާރެއް އޮވެފައި، އެމްޑީޕީގެ ބޭފުޅެއް ރައީސުލް ޖުމްހޫރިއްޔާގެ މަޤާމުގައި ހުންނެވީތީ ރައީސް ނަޝީދުގެ ޝަރީއަތް ބާރު ސްޕީޑެއްގައި ކުރިޔަށް ދާނެ ކަމަށް އުންމީދު ކުރައްވާ ކަމަށެވެ.
"އަޅުގަނޑުމެންގެ ސަރުކާރުން ވެސް އަދި މުއައްސަސާތަކުން ވެސް ވަރަށް ބާރަށް މިކަން ކުރިޔަށް ގެންދަން ޖެހޭނެ. އަޅުގަނޑަށް އޮތް އުންމީދަކީ މިއަދު އަޅުގަނޑުމެންގެ މެޖޯރިޓީ ޕާލިމެންޓެއް އޮވެފަ، އަޅުގަނޑުމެންނަށް ނިސްބަތްވާ، އަޅުގަނޑުމެންގެ މާބޮޑު ބާރެއް ސަރުކާރުގައި ނެތްކަމުގައި ވީ ނަމަވެސް، ކޯލިޝަން ސަރުކާރެއްގައި މި އޮންނަނީ 40 ޕަސެންޓް މިއީ ސަރުކާރެއް ހިންގާއިރުގައި ވަރަށް މަދު އަދަދެއް. 60 ޕަސެންޓަކީ އަޅުގަނޑުމެންގެ ވާދަވެރި ޕާޓީތަކުގެ އޮތް ސަރުކާރެއް. އެހެން ނަމަވެސް އަޅުގަނޑުމެންގެ ރައީސެއް ހުންނަވާ ޕާލިމެންޓެއް އޮތީތީ، އެހެން ކަންކަމުގައި ޝަރީޢަތް ހިނގައިފައިވާ ވަރަށް ވުރެ އަވަހަށް މި ޝަރީޢަތް ކުރިޔަށްދާނެ ކަަމަށް" ދޮންބިލަތް ވިދާޅުވިއެވެ.
ރައީސް ނަޝީދަށް އަމާޒުކޮށް ދިން ހަމަލާއަކީ ދިވެހި ރާއްޖޭގައި ހިނގި އެންމެ ނުރައްކާތެރި، އެންމެ ބޮޑު އެއް ހަމަލާ ކަމަށް އިޝާރަތްކޮށް ދޮން ބިލަތް ވިދާޅުވީ، ނަޝީދަށް ދިން ހަމަލާއަކީ މާ ބޮޑު ކަމެއް ކަމުގައި ނުހެދުމަކީ ހެދޭ ބޮޑު ގޯހެއް ކަމަށެވެ. އަދި ފަޔަށް މޮހޮރެއް ހެރުމުން ވާ ތަދުގެ މިސާލުން މިސާލު ނަންގަވައި ދޮން ބިލަތް ވިދާޅުވީ، ރައީސް ނަޝީދުގެ ހާލުކޮޅު އަދިވެސް ރަނގަޅު ނޫން ކަމަށެވެ.
"ދިވެހި ރާއްޖޭގެ ރައްޔިތުންނަށް ވަރަށް ބޮޑު ޚިދުމަތެއް ކުރައްވާ ވަރަށް ބޮޑު ޤުރުބާނީއެއް ވެ ވަޑައިގެންނެވި ބޭފުޅެއް އެއީ. އަދި އެއީ މުޅި ދުނިޔޭގައި ބަލައިގަތް ބޭފުޅެއް. ބައެއް މީހުންނަށް ހީވޭ ރައީސް ނަޝީދުގެ ހާލުކޮޅު ރަނގަޅު ވެއްޖޭ، އެކަމަކު އަދިވެސް ރައީސް ނަޝީދު ވަރަށް ބަލި" ދޮންބިލަތް ވިދާޅުވިއެވެ.
ރައީސް ނަޝީދަށް ދިން ހަމަލާ ، މާބޮޑު ކަމެއް ނޫންގެ ގޮތުގައި ނުދެކުމަށް އިރުޝާދު ދެއްވަމުން ދޮންބިލަތް އިތުރަށް ވިދާޅުވީ، ރާއްޖޭގައި ވަޅި ޖަހަން ފެށި ދުވަސްވަރު އެކަން ބޮޑު ކަމަކަށް ނުހެދުމުން އެކަން އާއްމު ވެގެން ދިޔަ ކަމަށެވެ. އަދި ރާއްޖެއަކީ ޓޫރިޒަމްއަށް ބަރޯސާވެފައިވާ ޤައުމަކަށް ވީހިނދު ބޮން ގޮއްވުން އާއްމު ވެގެން ގޮސްފިނަމަ މުސްތަޤްބަލު އަނދިރި ވާނެ ކަމަށް ވިދާޅުވިއެވެ.
ރައީސް ނަޝީދަށް ދިން ހަމަލާއާ ގުޅިގެން އެމްޑީޕީން ކުރަމުންދާ މަސައްކަތާ ގުޅޭ ގޮތުން މި ޕްރޮގްރާމްގައި ވާހަކަފުޅު ދައްކަވަމުން ދޮންބިލަތް ވިދާޅުވީ އެމްޑީޕީގެ މެއި 6 ކޮމިޓީން ކަންކަން ހިނގާ ގޮތް ވަރަށް ގާތުން ބަލަމުން އަންނަ ކަމަށެވެ. އަދި އެމްޑީޕީގެ އާއްމު މެންބަރުން ތިއްބެވީ ނަޝީދަށް ދެއްވި ހަމަލާގެ އެންމެ ފުލަށް ދިއުމަށް ތައްޔާރަށްކަމަށް ވިދާޅުވެ، ވިދާޅުވީ، ނަޝީދަށް ދިން ހަމަލާއަކީ ހަމައެކަނި ހަރުކަށި ފިކުރުގެ މީހުން ދިން ހަމަލާއެއް ނޫން ކަމަށާއި އެއީ ޒާތީ ހަމަލާއެއް ކަމަށެވެ.
މެޖޯރިޓީ އޮތީ ރާފުޅީގަ.