ދޫކޮށްލި 3 މީހުންގެ ތެރެއިން 2 މީހަކު އަލުން ހައްޔަރުކޮށްފި
ހަރުކަށި ފިކުރާ ދެކޮޅަށް ފުލުހުންނާއި ސިފައިން ހިންގި އޮޕަރޭޝަންގެ ތެރެއިން ހައްޔަރުކުރި ތިން މީހަކު ކްރިމިނަލް ކޯޓުން އިއްޔެ ދޫކޮށްލާފައިވާއިރު އޭގެ ތެރެއިން ދެ މީހަކު އަލުން ހައްޔަރުކޮށްފިއެވެ.
“ދެން” އަށް މަޢުލޫމާތު ދެމުން ފުލުހުންގެ މީޑިއާ އޮފިޝަލަކު ވިދާޅުވީ އިއްޔެ ދޫކޮށްލި 3 މީހުންގެ ތެރެއިން 2 މީހަކު ރޭ ކޯޓު އަމުރެއްގެ ދަށުން ހައްޔަރު ކޮށްފައިވާކަމަށެވެ. އަދި އެމީހުން ހައްޔަރުކޮށްފައި ވަނީ މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ކަމަށް ވެސް ފުލުހުން ވިދާޅުވިއެވެ.
ކުރިމިނަލް ކޯޓުގެ ގާޒީ ހަސަން ސައީދު އިއްޔެ ނެރުއްވި އަމުރުގައި ވިދާޅުވެފައި ވަނީ ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަނުގައި ހައްޔަރުކުރި ތިން މީހެއް ދޫކޮށްލުމަށް އަންގައިފައިވާ ކަމަށާއި އެ ތިން މީހުންނަކީ ރައީސް ނަޝީދަށް ދިން ބޮމުގެ ހަމަލައިގައި ބައިވެރިވިކަމަށް ތުހުމަތުކޮށް ހައްޔަރުކުރި ތިން މީހުން ކަމަށެވެ. އޭގެ ތެރޭގައި ހިމެނެނީ ފަހުމީ އަލީއާއި ޔާސީމް އަދި އިޝްހާގު ނަމަކަށް ކިޔާ ތިން މީހުންނެވެ.
ނަޝީދަށް ދިން ހަމަލާއާ ގުޅިގެން 8 މީހަކު މިހާތަނަށް ހައްޔަރު ކޮށްފައިވެއެވެ. އޭގެ ތެރެއިން ވަނަވަރު ހާމަކޮށްފައި ވަނީ 4 މީހެއްގެއެވެ. އެ މީހުންނަކީ ރައީސް ނަޝީދަށް ހަމަލާ ދިނުމުގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ ވ. ތިނަދޫ، ހިޔާ، އަދުހަމް އަހުމަދު ރަޝީދުގެ އިތުރުން މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ލ. ގަން ދުންފިނިއުފާ އަހްމަދު ފާތިހުއެވެ.
