އެސްޓާސްއަށް ހިޔާނަތްތެރިވި ކުރީގެ މުވައްޒަފަކު 8 ލައްކަ ރުފިޔާއިން ޖޫރިމަނާކޮށްފި
ރާއްޖޭގެ މަޝްހޫރު ވިޔަފާރި، އެސްޓާސްއަށް ހިޔާނާތްތެރިވީ، އެތަނުގެ ކުރީގެ މުއައްޒަފަކު 8 ލައްކައަށް ވުރެ ގިނަ ރުފިޔާއިން ޖޫރިމަނާކޮށްފިއެވެ.
އެސްޓާސްގެ އެކައުންޓްސް މެނޭޖަރެއްގެ މަގާމުގައި ކުރިން ހުރި މުވައްޒަފެއްގެ މައްޗަށް ކުރެވުނު ހިޔާނާތުގެ ދައުވާ ސާބިތުވެ އޭނާގެ މައްޗަށް އަށްލައްކަ ސާޅީސް ހާސް ރުފިޔާއިން ޖޫރިމަނާކޮށް ހުކުމް ކޮށްފައި ވަނީ މިދިޔަ ބުރާސްފަތި ދުވަހުއެވެ.
އޭނާގެ މައްޗަށް ހިޔާނާތުގެ ދައުވާ އުފުލައިފައި ވަނީ އެސްޓާސްއިން ކްރެޑިޓަށް މުދާ ނެގުމަށް ފަހު އެ މުދަލަށްވާ ފައިސާ ދިނުމަށް އެކި ފަރާތްތަކުން ދޫކޮށްފައިވާ ޗެކުތަކެއްގައި އެ ކުންފުނީގެ މެނޭޖިން ޑިރެކްޓަރުގެ ސޮއި ފޯޖުކޮށް، އެ ޗެކްތައް އެންޑޯސް ކުރުމަށް ފަހު އަމިއްލަ އެކައުންޓަށް ޖަމާކޮށް، ފަސްލައްކަ ހަތްދިހަ ނުވަހާސް ފަންސާސް ރުފިޔާއަށް ހިޔާނާތްތެރިވުމުންނެވެ. މިކުށަށް ތަހްގީގުގެ މަރުހަލާގައި އޭނާ ވަނީ އެއްބަސްވެފައެވެ. އެހެން ނަމަވެސް ޝަރީއަތުގައި އޭނާ ވަނީ ކުށަށް އިންކާރުކޮށްފައެވެ.
ކްރިމިނަލް ކޯޓުގައި ހެކިބަސް ދިން އެސްޓާސްގެ އިސް ވެރިއަކު ބުނެފައިވާ ގޮތުން އެ ފައިސާ ނެތްކަން އެނގުނީ، އެސްޓާސްއަށް ފައިސާ ނުލިބިގެން އެ ކުންފުނިތަކަށް ގުޅުމުން، ޗެކު ހަވާލުކޮށްފައިވާ ކަމަށް އެ ކުންފުނިތަކުން ބުނުމުންނެވެ. އެ ވާހަކަތައް ދެކެވެން ފެށުމުން، އެކައުންޓް ރިސީވަބަލް މެނޭޖަރު އޭނާގެ އެކައުންޓުން އެސްޓާސްގެ އެކައުންޓަށް ފައިސާ ޖަމާކުރުމަށް ފަހު އެ ފައިސާއަކީ އެހެން ކުންފުނިތަކުން ޖަމާކުރި ފައިސާ ކަމަށް ބުނެފައިވާ ކަމަށް އޭނާ ހެކިބަސް ދިނެވެ. އޭރު އިންޓަނެޓު މެދުވެރިކޮށް ޓްރާންސެކްޝަންތަކުގެ މައުލޫމާތު އެނގެން ނުހުންނަ ކަމަށް ބުނެފައިވެއެވެ.
އެކައުންޓް ރިސީވަބަލް މެނޭޖަރު ވެސް ޝަރީއަތުގައި ވަނީ އޭނާގެ އެކައުންޓަށް ފައިސާ ޖަމާވި ކަމަށް އެއްބަސްވެފައެވެ. ނަމަވެސް، ބުނީ، އެއީ ބަޔަކު އޭނާއަށް ދިން ލަނޑެއް ކަމަށެވެ.
ދައުވާ ލިބުނު މީހާއަކީ މިހާރު ޒިންމާދާރު ވަޒީފާއެއްގައި އުޅޭ މީހަކަށް ވާތީއާއި ދައުވާ ކުރީ 2013ގައި ކަމަށް ވުމުން އަދަބު ޖަލު ހުކުމަކުން ޖޫރިމަނާއަށް ބަދަލުކޮށްދޭން އޭނާ އެދުނެވެ. އެކަމަށް ދައުލަތުން އިއުތިރާޒު ނުކުރުމުން އޭނާގެ މައްޗައް ހުކުމް ކުރީ އަށް ލައްކަ ސާޅީސް ހާސް ރުފިޔާއިން ޖޫރިމަނާ ކުރާށެވެ.
އެސްޓާރސްއަކީ ރާއްޖޭގައި އިލެކްޓޯރނިކްސް ސާމާނާއި ފަރުނީޗަރުގެ ވިޔަފާރި ފުޅާދާއިރާއެއްގައި ހިންގާ ބައެކެވެ. އަދި އެސްޓާރސްއަކީ ގިނަ އަދަދަކަށް މުދާ އިންސްޓޯލްމަންޓަށް ދޫކުރާ ވިޔަފާރިއެއް ވެސް މެއެވެ.
