ކޮވިޑް-19 ޖެހިފައި ހުރި ފިރިހެނަކު މޫނު ބުރުގާ އަޅައިގެން ދަތުރުކުރަން އުޅެފި
ކޮވިޑް-19އަށް ފައްސިވެފައިވާ އިންޑޮނޭޝިއާ ފިރިހެނަކު، އަންހެނަކަށް ވެގެން ފްލައިޓަކަށް އެރި މައްސަައިގައި ހައްޔަރު ކޮށްފިއެވެ.
ރިޕޯޓުތަކުން ބުނެފައިވާ ގޮތުގައި "ޑީޑަބްލިޔު"ގެ ނަމުން އެނގިފައިވާ އެ މީހާ ފްލައިޓަށް އެރީ އޭނާގެ އަންހެނުންގެ މޫނު ބުރުގާ އަޅައިގެންނެވެ. އޭގެ އިތުރުން ޑީޑަބްލިޔު ފްލައިޓަށް އެރީ އޭނާގެ އަންހެނުންގެ ޕާސްޕޯޓާއި ނައްސި ކޮވިޑް ނަތީޖާ ވެސް ހިފައިގެން ކަމަށް ރިޕޯޓުތަކުން ބުނެއެވެ.
ބީބީސީން ބުނީ އެ މީހާ ކުރި ކަންތައް ފަޅައި އެރީ، ޖަކާޓާއިން ތެރްނޭޓަށް ދާން ކުރި އެ ދަތުރުމަތީގައި ހެދުން ބަދަލު ކުރުމުން ކަމަށެވެ.
ފްލައިޓް އެޓެންޑެންޓަކު ތެރްނޭޓްގެ ސެކިއުރިޓީއަށް ގުޅައިފައި ބުނީ، އަންހެނެއްގެ ހެދުމުގައި ނިގާބް އަޅައިގެން ހުރި މީހަކު ފާޚާނާއަށް ވަދެފައި ނުކުތީ ފިރިހެންނެއްހެން ހެދުން އަޅައިގެން ކަމަށެވެ. އެހެންކަމުން ފްލައިޓު ޖެއްސުމާ އެކު ސެކިއުރިޓީން ވަނީ ޑީޑަބްލިޔު ހައްޔަރުކޮށްފައެވެ.
އެތަނުގައި އެވަގުތު ހުރި ހެލްތު އޮފިސަރަކު އެ މީހާގެ ކޮވިޑް ޓެސްޓު ކުރި އިރު، ނަތީޖާ ދެއްކީ ބައްޔަށް ފައްސި ކަމަށެވެ. އޭނާ މިހާރު ހުރީ ފުލުސް އޮފީހުގައި އެކަހެރި ތަނެއްގައި ކަމަށާއި، ބަލިން ފަސޭހަވުމާ އެކު އޭނާގެ މައްޗަށް ދައުވާ ކުރަން ފޮނުވާނެ ކަމަށް އޮފިޝަލުން ބުނެފައިވެއެވެ.
ފުލުހުން ބުނެފައި ވަނީ ޑީޑަބްލިޔުއާ ސުވާލު ކުރުމުން، އޭނާ އެހެން ހެދީ މުހިންމު ދަތުރެއް ކުރަން ޖެހިފައި ހުއްޓާ ކޮވިޑަށް ފައްސިވުމުން ކަމަށް އޭނާ ބުނި ކަމަށެވެ.
