ކޮވިޑް ބަލި މީހުނަށް އެހީވާނެ 36 ނަރުހުން ހޯދަނީ
ކޮވިޑް-19އަށް ފައްސިވާ ފަރާތްތަކަށް ޚާއްސަކޮށްފައިވާ ހުޅުމާލެ މެޑިކަލް ފެސިލިޓީގައި އަދި ކޮވިޑް ބައްޔަށް ފަރުވާދޭ އެހެނިހެން ތަންތަނުގައި ވަގުތީ ގޮތުން މަސައްކަތްކުރާނެ ރެޖިސްޓަރޑް ނަރުހުން ހޯދަން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން އިއުލާންކޮށްފިއެވެ.
އައިޖީއެމްއެޗްއިން ކުރި އިއުލާނެއްގައި ބުނެފައިވަނީ ހުޅުމާލެ މެޑިކަލް ފެސިލިޓީއަދި/ ކޮވިޑް ބައްޔަށް ފަރުވާދޭ ތަންތަނުގައި މަސައްކަތް ކުރާނެ ވަގުތީ ނަރުހުން ބޭނުންވާ ކަމަށެވެ. އަދި ބޭނުން ވަނީ އެއް އަހަރުގެ މުއްދަތަށް ކަމަށް ބުނެފައިވެއެވެ. ވަގުތީ ނަރުހުންނަށް މަހަކު -/9060 ރުފިޔާ މުސާރައިގެ ގޮތުގައި ލިބޭއިރު މަސައްކަތް ކުރާ ކޮންމެ ދުވަހަކު އިތުރު އެލަވެންސެއްގެ ގޮތުގައި -/188 ރުފިޔާ ލިބޭނެއެވެ.
މީގެ އިތުރުން މަސައްކަތް ކުރަން ޖެހޭނީ ވަނީ ހަފުތާއަކު ފަސް ދުވަހު ދުވާލަކު އަށް ގަޑިއިރު ކަމަށް ވެސް އިޢުލާންގައިި ބުނެފައިވެއެވެ.
ވަގުތީ ނަރުހުންގެ ގޮތުގައި ނަގާ ނަރުހުން ކުރަން ޖެހޭ މައިގަނޑު މަސައްކަތްތަކަކީ:
- ރައްކާތެރިކަމާއެކު ބަލިމީހުންނަށް ބޭނުންވާ ނަރސިންގ ކެއަރ ރާވާ ޚިދުމަތްދީ އިވެލުއޭޓްކުރުން.
- ބަލިމީހުންނަށް ބޭނުންވާ ޖިސްމާނީ އިޖްތިމާއީ އަދި ނަފްސާނީ ފަރުވާ ދިނުމުގައި ނަރސިންގ ކެއަރގެ ޕްލޭން އެހެން ސިއްހީ ޕްރޮފެޝަނަލުންނާ އެކު ވިލަރެސްކޮށްގެން ރާވާ އެ ޕްލޭނާ އެއްގޮތަށް ފަރުވާދިނުން.
- ބަލިމީހާއާއި ބަލިމީހާގެ އާއިލާތަކުން ބަލިން ރައްކާތެރިވުމާއި ފަރުވާކުރުމާއި ކެއަރއާ ބެހޭގޮތުން ކުރާ ސުވާލުތަކަށް ޖަވާބުދީ އޮޅުންފިލުވައިދިނުން.
- ބަލިމީހުންނަށް ލިޔެދީފައިހުންނަ ޑޮކްޓަރީ ބޭހާ އެއްގޮތަށް ފަރުވާދީ، އެ ފަރުވާއަށް ބަލިމީހާގެ ހާލަތު ބަދަލުވަމުން އަންނަ ގޮތް ބަލަމުން ގެންދިއުމާއި އޭނާއަށް ބޭނުންވާ ޚާއްސަ އެހީތެރިކަމަށް އެހެން ސިއްހީ ޕްރޮފެޝަނަލުންގެ ޚިދުމަތް ބޭނުންވާ ހާލަތްތަކުގައި އެކަންތައްތައް ފެސިލޭޓްކޮށްދިނުން.
- ބަލިމީހާގެ ސިއްހީ މައުލޫމާތާއި ދެވުނު ބޭސްފަރުވާގެ މައުލޫމާތު ރެކޯޑްކުރާ ނިޒާމުގައި ލިޔެ އަޕްޑޭޓްކުރުން.
މިމަޤާމަށް ކުރިމަތިލާ ފަރާތްތަކުން ނަރސިންގެ ރޮނގަކުން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 5 ނުވަތަ 6 ގެ ސަނަދެއް ހާސިލްކޮށްފައިވާން ޖެހެއެވެ.
މި މަގާމްތަކަށް ޝައުގުވެރިވާ ފަރާތްތަކުން 05 އޮގަސްޓް 2021 ވާ ބުރާސްފަތި ދުވަހުގެ 13:00 ގެ ކުރިން [email protected] އަށް އެޕްލިކޭޝަން ފޯމް ހުށަހަޅަން އައިޖީއެމް ހޮސްޕިޓަލުން އެދެއެވެ.
