ބަރަހަނާ ފިލްމު އުފެއްދީކީ ނޫން އުނގަންނައިދިނީ، ފިރިމީހާގެ ކުށެއް ނެތް: ޝިލްޕާ
ބޮލީވުޑްގެ ފިލްމީތަރި ޝިލްޕާ ޝެޓީގެ ފިރިމީހާ ރާޖް ކުންދްރާ އުފެއްދީ ބަރަހަނާ ފިލްމެއް (ޕޯން) ނޫން ކަމަށާއި އޭނާގެ ފިރިމީހާގެ އެއްވެސް ކުށެއް ނެތް ކަމަށް ޝިލްޕާ ބުނެފިއެވެ.
ބަރަހަނާ ފިލްމު އުފެއްދިކަމުގެ ރާޖް ކުންދްރާ މިވަގުތު ވަނީ ހައްޔަރު ކޮށްފައެވެ. އަދި އެ މައްސަލައާ ގުޅިގެން މުމްބާއީ ފުލުހުން ވަނީ ޝިލްޕާއާ އިއްޔެ ސުވާލު ކޮށްފައެވެ.
ފުލުހުންނަށް މައުލޫމާތު ދެމުން ޝިލްޕާ ބުނީ އެފަދަ މަންޒަރު ދައްކާ އެޕްލިކޭޝަނެއް އޭނާގެ ފިރިމީހާގެ ފޯނުގައިވާކަން އޭނާއަށް އެނގިފައި ނުވާ ކަމަށެވެ. ޝިލްޕާ ބުނީ އެ އެޕްލިކޭޝަނަކީ ރާޖް ކުންދްރާގެ ބޭބެ ޕްރަދީޕް ބަކްޝީއާ ގުޅުން ހުރި އެޕްލިކޭޝަނެއް ކަމަށެވެ.
ޝިލްޕާ އިތުރަށް ބުނެފައި ވަނީ އޭނަގެ ފިރިމީހާ އުފައްދައިފައި ވަނީ ބަރަހަނާ ފިލްމު ނޫން ކަމަށާއި އެ ވީޑިއޯތަކަކީ ޖިންސީ ގުޅުމުގެ ކަންކަން އުނގަންނައިދޭ ވީޑިއޯތަކެއް ކަމަށެވެ. އެއީ ތަފާތު ދެ ކަމެއްކަން ވެސް ޝިލްޕާ ފުލުހުންނަށް ވިސްނައިދެވޭތޯ އުޅުނު ކަމަށް އޭއެންއައި ނޫހަށް މައުލޫމާތު ދެމުން މުމްބާއީ ފުލުސް އޮފިސަރަކު ބުނެފައިވެއެވެ.
ރާޖް ކުންދްރާ އުފެއްދި ވީޑިއޯތަކުގެ އެއްވެސް މައުލޫމާތެއް އަދި ފިރިމީހާގެ އެ އަމަލުގެ އެއްވެސް މައުލޫމާތެއް ޝިލްޕާގެ ކިބައިން ލިބިފައި ނުވާ ކަމަށް ވެސް މުމްބާއީ ފުލުހުންނާ ހަވާލާދީ މީޑިއާތަކުން ބުނެފައި ވެއެވެ.
ބަރަހަނާ ފޮޓޯތަކާއި ވީޑިއޯ އުފައްދާ ވިއްކި ކަމުގެ ތުހުމަތުގައި 27 ޖުލައި 2021 ވަންދެން ރާޖް ކުންދްރާ ބަންދު ކޮށްފައިވާއިރު، މިހާތަނަށް އޭނާގެ އަތުން 48 ޓީބީ ފުރެންދެން ހުރި ބަރަހަނާ ފޮޓޯއާއި ވީޑިއޯ ފުލުހުންނަށް އަތުލައިގަނެވިފައިވާ ކަމަށް ވެސް މީޑިއާ ބުނެއެވެ.
މީގެއިތުރުން އޮންލައިންކޮށް ބެޓް ކޮށްގެން ވެސް އެފަދަ ވީޑިއޯތަކުގެ ވިޔަފާރި ކޮށްފައި ހުރި ކަމަށާއި އެގޮތުން 7.5 ކްރޯޑް ރުޕީސް ރާޖް ކުންދްރާގެ އެކައުންޓުގައި ހުރިކަން ވެސް ތަހުގީގަށް ހޯދިފައިވާކަމަށް ފުލުހުން ވަނީ ބުނެފައެވެ.
