ހައެއް ފަހެއްގެ ހަމަލާ: ހައިޝަމްއަށް ދައުވާ ކުރަން ޕީޖީއަށް ފޮނުވައިފި
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދުއަށް އަމާޒުކޮށް މި އަހަރުގެ މެއި މަހުގެ ހަވަނަ ދުވަހުގެ ރޭ ދިން ނިރުބަވެރި ހަމަލާއާ ގުޅިގެން، ތުހުމަތުކުރެވޭ މީހުންގެ ތެރެއިން އަލީ ހައިޝަމްގެ މައްޗަށް ދައުވާކޮށްދިނުމަށް އެދި ފުލުހުން ހުށަހެޅި މައްސަލަ ޕީޖީ އޮފީހުން ބަލައިގަނެފިއެވެ.
މި ހަމަލާއާ ގުޅިގެން 10 މީހަކު ހައްޔަރު ކޮށްފައިވާ އިރު، ހައިޝަމްއަކީ އެ ހަމަލާ ރޭވުމުގައި އިސްކޮށް ހަރަކާތްތެރިވި އެކަކު ކަމަށް ފުލުހުން ވަނީ ތުހުމަތު ކުރައްވައިފައެވެ.
މިކަމާ ގުޅިގެން ޕްރޮސެކިއުޓާ ޖެނެރަލް (ޕީޖީ) މިއަދު ކުރެއްވި ޓްވީޓެއްގައި ވިދާޅުވެފައި ވަނީ މެއި ހައެއްގެ ހަމަލާއާ ގުޅިގެން ތުހުމަތުކުރެވޭ އިތުރު މީހެއްގެ މައްޗަށް ދައުވާކޮށްދިނުމަށް އެދި ފޮނުވައިފައިވާ މައްސަލައެއް ޕީޖީ އޮފީހުން ބަލައިގަނެފައިވާ ކަމަށެވެ.
މި މައްސަލައާ ގުޅޭގޮތުން އިތުރު މައުލޫމާތު ދެއްވުމަށް އަންނަ ހަފްތާގެ ތެރޭގައި ނޫސްވެރިންގެ ބައްދަލުވުމެއް ވެސް ބާއްވާނެ ކަމަށް ޕީޖީ ޝަމީމް ވިދާޅުވިއެވެ.
ރައީސް ނަޝީދުއަށް ދިން ހަމަލާއާ ގުޅިގެން ދައުވާ ކުރަން މައްސަލަ ފޮނުވައިފައި ވަނީ:
- ވ. ތިނަދޫ، ހިޔާ, އަދުހަމް އަހުމަދު ރަޝީދު
- މއ. ފޭރުގެ، މުޖާޒު އަހުމަދު
- ގއ. ކޮނޑޭ، ފޮޅޭމާ، ތަހުމީން އަހުމަދު
- ލ. ގަން، ދުންފިނިއުފާ، އަހްމަދު ފާތިހު
- ނ. މަނަދޫ، ނޫރީގެ، އަލީ ހައިޝަމް ގެ މައްޗަށެވެ.
ހަމަލާގައި ބައިވެރިވިކަމުގެ ތުހުމަތުގައި ބަންދުގައި ތިބީ:
- ކ. މާލެ، ކުދެހިގެ، އިސްހާގު
- ގއ. ވިލިނގިލި، ހުދުރުވާގެ، ފަހުމީ އަލީ
- އއ. މާޅޮސް، އަސަރީގެ، މުހައްމަދު ނާޒިމް
- ހއ. މުޅަދޫ، ބަހާރުގެ، އަބްދުﷲ އަލި މަނިކު
- ހއ. ހޯރަފުށި، އަލަނާސިގެ، މުހައްމަދު ތަސްލީމް އެވެ.
މެއި މަހުގެ ހަ ވަނަ ދުވަހުގެ ރޭ ދިން އެ ހަމަލާއަކީ، ޖާނުން ފިދާވެގެން ވެސް ރައީސް ނަޝީދަށް ހަމަލާ ދޭން ތައްޔާރުވި ހަމަލާއެއް ކަމަށް ފުލުހުން ވިދާޅުވިއެވެ.
