އާޒިމްގެ ރައްދެއް މުޢިއްޒުއަށް: މިއަދު މި ޖެހޭ ތަކުލީފަކީ އިއްޔެ ކަންކުރި ގޮތުން ވާގޮތެއް!
ކަރަންޓު ބިލު ބޮޑުވެގެން މިއަދު މި ޖެހޭ އުނދަގުލާއި ތަކުލީފަކީ އިއްޔެ ކަންކުރިގޮތުން ވާގޮތެއް ކަމަށް ވިދާޅުވެ އެމްޑީޕީގެ ޕާލިމަންޓްރީ ގްރޫޕްގެ ލީޑަރު އަލީ އާޒިމް މާލެ ސިޓީގެ މޭޔަރު ޑރ. މުޙައްމަދު މުޢިއްޒުއަށް ރައްދު ދެއްވައިފިއެވެ.
މި މަހުގެ ކަރަންޓު ބިލަކީ މާލޭގެ ގިނަ ރައްޔިތުންނަށް ދެއްކޭ ވަރަށް ވުރެ ބޮޑު ބިލެއް ކަމަށް ވިދާޅުވެ ޑރ. މުޢިއްޒު މިއަދު ވަނީ ކަންބޮޑުވުން ފާޅުކުރައްވައިފައެވެ.
"ޙާލުގައި އުޅެމުންދާ ރައްޔިތުން އިތުރަށް ޙާލުގައި ޖެހޭ ގޮތް މިވަނީ ވެފައި. ރައްޔިތުން އަތުގައި ނެތް ފައިސާއަކުން ބިލް ދައްކަން މިވަނީ ޖެހިފައި." ޑރ. މުޢިއްޒު ކުރެއްވި ޓްވީޓުގައި ވިދާޅުވެފައިވެއެވެ.
އެ ޓްވީޓަށް ރައްދު ދެއްވަމުން އާޒިމް ވިދާޅުވީ އެކަން އެގޮތަށް ދިމާވީ ޑރ. މުޢިއްޒު އިންނެވި ކެބިނެޓަކުން ދެކޮޅު ނުޖެހޭ އިޤްތިޞާދީ ގިނަ ނިންމުންތަކެއް ނިންމުމުގެ ސަބަބުން ކަމަށެވެ.
"އިރާދަފުޅުން މާދަމާއަކީ ރަނގަޅު ދުވަހަކަށް ހަދާނަން" އާޒިމް ވިދާޅުވިއެވެ.
ވެރިކަން ކުރާ އެމްޑީޕީ ތެރޭގައި އުފެދުނު ޚިޔާލު ތަފާތުވުންތަކަށް ފަހު ރައީސް އިބްރާހިމް މުހައްމަދު ޞާލިހާއި ކުއްލި ގޮތަކަށް ބައްދަލު ކުރެއްވުމަށް ފަހު އާޒިމް ވަނީ ސަރުކާރަށް ތާއީދުކޮށް ވާހަކަ ދައްކަވަން ފައްޓަވައިފައެވެ.
