އެމޭޒަން ޕްރައިމްގައި އެންމެ ގިނައިން ބެލި ފިލްމަކަށް "ތޫފާން"
އެމޭޒަން ޕްރައިމްގައި ހަފްތާއެއްގެ ތެރޭ އެންމެ ގިނައިން ބެލި ފިިލްމަކަށް ފަރްހާން އަހްތަރް ލީޑް ރޯލް އަދާކޮށްދީފައިވާ ފިލްމު ތޫފާން ވެއްޖެއެވެ.
ފަރްހާންގެ އިތުރުން ދެން މިފިލްމުން ފެނިގެންދާ ތަރިންގެ ތެރޭގައި ޕަރޭޝް ރަވާލް އަދި މުރުނަލް ޓާކުރް ހިމެނެއެވެ. މިފިލްމު ރިލީޒް ކޮށްފައިވަނީ މި ޖުލައިމަހުގެ 16 ވަނަ ދުވަހުއެވެ. އެޔާއެކު މިހާތަނަށް އިންޑިޔާގެ 3900 ސިޓީއަކާއި އަވަށްތަކުން ގިނަ އަދަދެއްގެ މީހުންވަނީ މިފިލްމު ބަލާފައެވެ. އަދި 160 އަށް ވުރެ ގިނަ ގައުމުން އެމޭޒަން ޕްރައިމް މެދުވެރިކޮށް މިފިލްމް ބެލޭނެ ގޮތްވަނީ ހަމަޖެހިފައެވެ. މިއީ މިހާތަނަށް އެމޭޒަން ޕްރައިމްގައި ހިންދީ ފިލްމެއް އެޅުވި ހަފްތާގައި އެންމެ ގިނަ މީހުންބެލި ފުރަތަމަ ފިލްމެވެ.
މިއާއެކު ފިލްމުގެ ލީޑް ރޯލުން ފެނިގެންދިޔަ ފަރްހާންވަނީ އިންސްޓަގްރާމްގައި ފޭނުންނަށް ޝުކުރު އަދާކޮށްފައެވެ. އަދި އޭނާބުނި ގޮތުގައި މިއީ ވަރަށް ބުރަ މަސައްކަތެއްކަމަށާއި މަސައްކަތް ކުރަންވާނީ ބަދަލުގައި އެއްޗެއް ލިބޭނެކަމަށް ނޫންކަމަށްވެސް ބުނެފައެވެ. އެހެންނަމަވެސް ބަދަލުގައި އެއްޗެއް ލިބޭފަހަރު އެލިބެން މެދުވެރިވި ފަރާތް ހަނދާންކުރުމަކީ މުހިންމުކަމެއްކަމަށް ފަރްހާންގެ ޕޯސްޓްގައި ބުނެފައިވެއެވެ.
އުމުރުން 47 އަހަރުގެ ފަރްހާންއަކީ ފާހަގަކޮށްލެވޭ ގިނަ ފިލްމުތަކެއް ބެލުންތެރިންނާހަމަޔަށް ގެނެސްދީފައިވާ ފަންނާނެކެވެ. މިގޮތުން "ޒިންދަގީ ނާ މިލޭންގޭ ދޮބާރާ" އަދި "ބާގް މިލްކާ ބާގް" ފާހަގަކޮށްލެވެއެވެ.
Ads by STO
