ބޮލީވުޑް ސްކްރީން: ބަރަހަނާ ފިލްމު ކުޅުނު އަންހެނަކަށް ރާޖް ކުންދްރާ ޖިންސީ ގޯނާ ކުރިކަމުގެ ތުހުމަތު!
ބޮލީވުޑްގެ ޚަބަރުތަކަށް މިއަދު އަވަސް ކަޅިއެއް ހިންގައިލާއިރު، ދާއިރާގައި އެންމެ މަޝްހޫރު ބައެއް ތަރިންގެ ވާހަކަތަކާއި މިދުވަސްވަރު އެންމެ ވައިގައި ހިފައިފައިވާ ޚަބަރުތައް ފާހަގަ ކޮށްލެވެއެވެ.
އެގޮތުން ގިނަ ބަޔަކަށް އެންމެ ކަމުދާ އޮން-ސްކްރީން ޖޯޑު ކަމަށްވާ ޝާހްރުކް ޚާންއާއި ކާޖޮލް އެކުގައި ފިލްމަކުން ފެންނަން އުޅޭ ކަމުގެ އަޑުތައް ވަނީ ފެތުރިފައެވެ. މީގެ އިތުރުން ބަރަހަނާ ފިލްމު އުފެއްދިކަމުގެ ތުހުމަތުގައި ދައުވާ ކޮށްފައިވާ ރާޖް ކުންދްރާގެ މައްޗަށް އިތުރު ތުހުމަތެއް ފެންމަތިވުމާއި ޝިލްޕާ ޝެޓީގެ މަންމަ ފުލުހަށް މައްސަލައެއް ހުށަހަޅައިފައިވާ ޚަބަރެއް ވެސް ފާހަގަ ކޮށްލެވެއެވެ.
ގިނަ ދުވަސްތަކަކަށް ފަހު ޝާހްރުކްއާއި ކާޖޮލް އެކީގައި ފެންނަނީ
ބޮލީވުޑްގެ ސުޕާސްޓާ އަދި "ކިންގް ޚާން" ގެ ލަގަބު ހޯދައިފައިވާ މަޝްހޫރު އެކްޓަރ ޝާހްރުކް ޚާންއާ އެންމެ ގުޅޭ އަންހެން އެކްޓަރަކީ ކާޖޮލްކަމާ މެދު ދެބަސް ވާނީ މަދު ބައެކެވެ. މިހާތަނަށް މި ދެ ތަރިން އެކުގައި ކުޅެފައިވާ ހުރިހާ ފިލްމަކާއި އިޝްތިހާރަކަށް ވެސް ލިބިފައިވާ ހޫނު ތަރުހީބަކީ މިކަމުގެ އެއް ހެއްކެވެ. ދެ މީހުންނަކީ ވެސް އެކަކު އަނެކަކުގެ ފޭވަރިޓަށް ވެސް ވީ ހިނދު، މި ދެ ތަރިން އެކުގައި އަނެއްކާވެސް ފިލްމަކުން ނަމަވެސް ފެނިލުމަކީ އެތައް ބަޔަކު ދެކޭ ހުވަފެނެކެވެ.
މަޝްހޫރު ފިލްމު ޕްރޮޑިއުސަރ ރާޖްކުމާރް ހިރާނީ މިވަނީ ބެލުންތެރިއެއްގެ އެ އެދުން ފުރިހަމަ ކޮށްދީފައެވެ. އޭނާ ދެން އެންމެ އަވަހަށް އުފައްދާ ފިލްމުގައި ހަރަކާތްތެރި ވާނީ ކާޖޮލްއާއި ޝާހްރުކް ކަމަށް ހިރާނީ ވަނީ އިއުލާނު ކޮށްފައެވެ.
ރާޖް ކުންދްރާގެ މައްޗަށް އަނެއްކާވެސް އިތުރު ތުހުމަތެއް!
މިހާރު ބޮލީވުޑްގައި އެންމެ ގަދަޔަށް ދެކެވޭ އެއް ވާހަކައަކީ އެކްޓްރެސް ޝިލްޕާ ޝެޓީގެ ފިރިމީހާ ރާޖް ކުންދްރާ، ބަރަހަނާ ފިލްމު އުފެއްދި މައްސަލައެއްގައި ހައްޔަރު ކޮށްފައިވާ ވާހަކައެވެ. އޭނާގެ ކުށެއް ނެތް ކަމަށް ޝިލްޕާ ވެސް ކުރިން ބުނި ނަމަވެސް، ފަހުން ބުނެފައި ވަނީ ރާޖްގެ ސަބަބުން ޝިލްޕާއާއި އެމީހުންގެ އާއިލާގެ ނަން ވެސް ހަޑިވެއްޖެ ކަމަށެވެ.
އެ މައްސަލަތަކުން ރަނގަޅަށް އަރައިނުގަނެވިގެން އުޅެނިކޮށް ކުރިން ބަރަހަނާ ފިލްމު ކުޅުނު ޝާރލޭން ޗޯޕްރާ ވަނީ އިތުރު ތުހުމަތެއް ކޮށްފައެވެ. ރިޕޯޓުތަކުން ބުނާ ގޮތުގައި ޝާރލޭން ކޮށްފައިވަނީ ޖިންސީ ގޯނާ ކުރިކަމުގެ ތުހުމަތެވެ.
ޝާރލޭން ބުނީ އެމީހުން އުފެއްދި "ކޮންޓެންޓެއްގެ" މައްސަލައެއްގައި އަންގައި ވެސް ނުލާ އެއް ދުވަހަކު ރާޖް ކުންދްރާ އެގެއަށް ދިޔަ ކަމަށާއި އެ ހަމަނުޖެހުމުގެ ތެރޭގައި އޭނާ ޝާރލޭންއަށް ޖިންސީ ގޯނާ ކުރި ކަމަށެވެ. ނަމަވެސް "މާބޮޑު ވަރު" ނުކުރެވެނީސް އޭނާ ކޮށްޕައިލައިފައި ދުރަށް ގޮސް ފާޚާނާ ތެރެއަށް ވަނީ ކަމަށާއި އެތަނުން ނުކުތީ ރާޖް ދިޔުމުން ކަމަށް ވެސް ޝާރލޭން ބުނެފައިވެއެވެ. މި ހާދިސާ ހިނގީ 2019 ވަނަ އަހަރުގެ މާރޗް މަހުގެ 29 ވަނަ ދުވަހު ކަމަށް ވެސް ޝާރލޭން ބުނެފައިވެއެވެ. އަދި މި މައްސަލައިގައި ރާޖް ކުންދްރާއާ ދެކޮޅަށް ފުލުހުގައި މައްސަލަ ޖެއްސި ކަމަށާއި ނަމަވެސް އެ މައްސަލަ ކުރިއަށް ނުދިޔަ ކަމަށް ވެސް ބުނެފައިވެއެވެ.
ޝާރލޭން މި ވާހަކަތަށް ކިޔައިދީފައި ވަނީ ރާޖް ކުންދްރާގެ މައްސަލައިގެ ތަހުގީގަށް އޭނާ ފުލުސް އޮފީހަށް ހާޒިރު ކުރުމުންނެވެ.
ޝިލްޕާއަށް އިތުރު ބޮލުގެ ރިހުމެއް!
މިދުވަސްވަރަކީ ޝިލްޕާ ޝެޓީއަށް އެހާ ފަސޭހަ ދުވަސްވަރަކަށް ނުވެއެވެ. ހުތުރު ތުހުމަތެއްގައި ފިރިމީހާ ޖަލަށް ލައިފައި އޮތް އިރު، ޝިލްޕާގެ މަންމަ ސުނަންދާ ޝެޓީ ވަނީ ފުލުހަށް މައްސަލައެއް ހުށަހަޅައިފައެވެ.
ޝިލްޕާގެ މަންމަ ފުލުހަށް މައްސަލަ ހުށަހަޅައިފައި ވަނީ ސުދާކަރް ގާރޭ ނަމަކަށް ކިޔައި މީހަކާ ދެކޮޅަށެވެ. ރިޕޯޓުތަކުން ބުނާ ގޮތުގައި އެ މީހާއާ ދެކޮޅަށް ސުނަންދާ މައްސަލަ ޖެއްސީ، ފޭކް ލިޔުންތަކެއް ދައްކައިގެން އޭނާއަށް 1.6 ކްރޯޑްގެ ބިން ވިއްކައިފައިވާ ކަމުގެ މައްސަލައިގައެވެ.
