ފާނަބަސަންދުހާ އަވަހަށް ޑެލްޓާ ވޭރިއެންޓް ފެތުރޭ ކަމަށް ބުނާ ސިއްރު ލިޔެކިޔުންތަކެއް ލީކް ވެއްޖެ
އިންޑިއާއިން ފުރަތަަމަ ފެނުނު ކޮވިޑް-19ގެ ޑެލްޓާ ވޭރިއަންޓް، ފާނަބަސަދުހާ އަވަހަށް ފެތުރޭ ކަމަށް އެމެރިކާގެ ސެންޓަރ ފޯރ ޑިޒީސް ކޮންޓްރޯލް (ސީޑީސީ) އިން ލީކްކޮށްލާފައިވާ ސިއްރު ލިޔެކިޔުންތަކަކުން ހާމަވެއްޖެއެވެ.
ވޮޝިންޓަން ޕޯސްޓްއިން ލީކްކޮށްފައިވާ މި ލިޔެކިޔުންތަކުގައިވާ ގޮތުގައި، ވެކްސިން ޖަހައިފައިވާ މީހުންނާއި ނުޖަހާ ތިބި މީހުންގެ މެދުގައި ވެސް މި ވޭރިއެންޓު ފެތުރެނީ އެއް ހަލުވި މިނެއްގައި ކަމަށް ބެލުމުގެ ފުރުސަތު އެބައޮތެވެ. އެހެން ނަމަވެސް ޔަގީންކަމާ އެކު އިތުރު ޑޭޓާ ލިބުމުން ކަމަށް ވެސް ބުނެފައިއެވެ.
އެ ލިޔުމުގައިވާ ގޮތުން، ޑެލްޓާ ވޭރިއަންޓަކީ އެހެން ވޭރިއެންޓުތަކަށް ވުރެ މާ ބޮޑަށް މީހާއަށް ބަލި ޖައްސާ ވޭރިއަންޓެއް ކަމަށާއި މި ވޭރިއަންޓްގެ ސަބަބުން ކޮވިޑް-19އާ ދެކޮޅަށް ކުރަމުން އައި ހަނގުރާމަ ބަދަލުވެއްޖެ ކަމަށެވެ.
އެމެރިކާގައި މިދިޔަ ހަފްތާގައި އަލުން މާސްކް އަޅަން މަޖުބޫރުކޮށްފައި ވަނީ މި ލިޔެކިޔުންތަކަށް ބަލައިފައި ކަމަށް ބޭރުގެ މީޑިއާތަކުން ރިޕޯޓްކުރެއެވެ. އެމެރިކާގައި ކޮވިޑް-19 ވެކްސިން ޖެހި ފަރާތްތަކަށް މާސްކް އެޅުމަށް ލުއި ދީފައި އޮތް އޮތުން މިދިޔަ ހަފްތާގައި ވަނީ އަނބުރައި ގެންގޮސްފައެވެ.
ނިއުޔޯކް ޓައިމްސްއަށް ދިން ބަސްދީގަތުމެއްގައި ސީޑީސީގެ ޑިރެކްޓަރ ވިދާޅުވީ، ފަހުގެ ދިރާސާތަކުން ދައްކާ ގޮތުގަިއ ވެކްސިން ޖެހި ކަމުގައި ވިޔަސް ޑެލްޓާ ވޭރިއަންޓް ޖެހުމުން ނޭފަތުގައި އަދި ކަރުގައި ވައިސް ހުންނަ މިންވަރު މަތި ކަމަށެވެ. އަދި ކުރިން ހީކުރިވަރަށް ވުރެ އިތުރަށް ވެކްސިން ޖަހައިފައި ތިބި މީހުންނަށް ބަލި ޖެހޭ ކަމަށް ވިދާޅުވިއެވެ.
