"ހަމަލާއެއް ދޭން އުޅޭކަމަށް ލިބުނު މައުލޫމާތު ފުލުހުންނާ ހިއްސާ ނުކުރި މައްސަލައިގައި އިލްޔާސްގެ މައްޗަށް ދައުވާ ކުރެވިދާނެ"
ކުރީގެ ރައީސް މުޙައްމަދު ނަޝީދު އަވަހާރަކޮށްލުމަށް އަމާޒުކޮށް ހަމަލާއެއް ދޭން އުޅޭ ކަމަށް ބުނެ ހުޅުދޫ ދާއިރާގެ މަޖިލިސް މެންބަރު އިލްޔާސް ލަބީބްގެ ރައްޓެއްސަކު އޭނާއާ ހިއްސާކުރި މައުލޫމާތު ފުލުހުންނާއި ހިއްސާކޮށްފައި ނުވާ މައްސަލައިގައި އޭނާގެ މައްޗަށް ދައުވާ ކުރެވިދާނެ ހާލަތެއް މެދުވެރިވެދާނެ ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.
ރައީސް ނަޝީދަށް ހަމަލާއެއް ދޭން އުޅޭކަމުގެ މައުލޫމާތު އިލްޔާސް ލަބީބުއާ އޭނާގެ ރައްޓެއްސަކު ވަނީ ހިއްސާ ކޮށްފައި ކަމަށް ރައްޔިތުންގެ މަޖިލީހުން މި މައްސަލަ ތަހުގީގު ކުރި 241ކޮމިޓީން ވަނީ ހާމަކޮށްފައެވެ. އެ ކޮމިޓީން ވަނީ އެ މައުލޫމާތު އިލްޔާސް ލަބީބު ކޮމިޓީއާ ހިއްސާ ކުރެއްވި ކަމަށް ވިދާޅުވެފައެވެ. އޭގެ އިތުރުން އެ މައުލޫމާތު ޑިފެންސް މިނިސްޓަރ މާރިޔާ އަހުމަދު ދީދީއާ ހިއްސާ ކުރެއްވި ކަމަށް ވެސް ވިދާޅުވިއެވެ.
ރައީސް ނަޝީދުގެ އެދިލެއްވުމަކަށް މިނިސްޓަރ މާރިޔާއާ އެ މައުލޫމާތު ހިއްސާ ކުރެއްވީ މެއި މަހުގެ ތިން ވަނަ ދުވަހުގެ ރޭ ކަމަށް ވެސް އިލްޔާސް ވަނީ ވިދާޅުވެފައެވެ. ރައީސް ނަޝީދާ އެ މައުލޫމާތު ހިއްސާ ކުރެއްވީ އެ ދުވަހު ކަމަށް ވެސް މައުލޫމާތު ލިބެއެވެ.
މިކަމާ ގުޅޭގޮތުން މެންބަރު ހުސައިން ޝަހީމް ރޭ ވިދާޅުވީ އެފަދަ މައުލޫމާތެއް ލިބިވަޑައިގެން ހުންނަވާ ފުލުހުންނާ ހިއްސާ ނުކުރެއްވުމަކީ އިލްޔާސް ލަބީބު ހެއްދެވި ގޯހެއް ކަމަށެވެ. އަދި މަޖިލީސް ރިޕޯޓް ނެރުނު ފަހުން އެފަދަ މައުލޫމާތެއް މެންބަރު އިބްރާހިމް ރަޝީދު (ބޮންޑޭ)އަށް ވެސް ލިބިވަޑައިގެންފައިވާ ކަމަށް އޭނާ ވިދާޅުވެފައިވާ ކަމަށް ހުސެއިން ޝަހީމް ވިދާޅުވިއެވެ.
ނަމަވެސް އެއިން އެއްވެސް ބޭފުޅަކު އެ މައުލޫމާތު ފުލުހުންނާ ހިއްސާކޮށްފައި ނުވުމަކީ ގޯހެއް ކަމަށާއި ރައީސް ނަޝީދަށް އަމާޒުކުރި ހަމަލާއާ އެ ބޭފުޅުންނަށް ލިބިވަޑައިގެންނެވި މައުލޫމާތާ އެއްވެސް ގޮތަކުން ގުޅޭ ނަމަ އެ ބޭފުޅުންގެ މައްޗަށް ދައުވާ ކުރެވޭނެ ކަމަށް ވެސް ހުސައިން ވިދާޅުވިއެވެ.
"މީގެން އެއްވެސް ބޭފުޅަކު ނެތޭ ޕޮލިހަށް އަންގައިފައެއް މިކަން (ބޮން ގޮއްވުމުގެ) ކުރިއަކުން ނެތް. މިއީ ގާނޫނު ބުނާ ގޮތުން މި ބޭފުޅުންގެ މައްޗަށް ގާނޫނީ ދަައުވާ އުފުލަން ޖެހިއްޖެއްޔާ، ރަައީސް ނަޝީދަށް މި އަމާޒުކުރި ބޮމުގެ ކަންތަކާ އެއްވެސް ގޮތަކުން މި ލިބިފައިވާ މައުލޫމާތާ ގު ޅޭނަމަ ދައުވާ ކުރެވޭނެ ފަރާތްތަކޭ މިއީ. މި ދަންނަވާ ވާހަކައަކީ މި ބޮމާއި މި ބޭފުޅުންނަށް އެނގިފައިވާ އެއްޗަކާއި މި ލިންކުވާ އެއްޗެއް ނަމަ މިއީ ކުށްވެރިވާނެ ބޭފުޅުންނޭ ހައްތަހާ ވެސް،" ހުސެއިން ޝަހީމް ވިދާޅުވިއެވެ.
ރައީސް ނަޝީދަށް އަމާޒުކޮށްގެން މެއި މަހުގެ ހަވަނަ ދުވަހުގެ ރޭ ދިން ނިރުބަވެރި ހަމަލާ ފުލުހުން އަދިވެސް ދަނީ ތަހުގީގު ކުރަމުންނެވެ. ނަމަވެސް ތަހުގީގަށް ރައީސް ނަޝީދު އަދި އެއްބާރުލުމެއް ނުދެއްވާ ކަމާއި ބަޔާން ވެސް ނުދެއްވާކަން ފުލުހުންނާއި ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް ވެސް ވަނީ ފާހަގަ ކުރައްވައިފައެވެ.
