މެމްބަރު އުޝާމްގެ ޝަކުވާތަކެއް ސިޓީ ކައުންސިލަށް!
ރައްޔިތުންނާ ގާތުން މަސައްކަތް ކުރުމަށް މާލޭސިޓީ ކައުންސިލުން ކުރަމުންދާ މަސައްކަތުގެ ތެރެއިން ރޭ ވިލިމާލެ ރައްޔިތުންނާ ބައްދަލު ކުރުމަށް ބޭއްވި ބައްދަލުވުމުގައި ވިލިމާލޭ ދާއިރާގެ މެމްބަރު އަހުމަދު އުޝާމްއާ ސިޓީ ކައުންސިލުން ގުޅުމެއް ނުބާއްވާ ކަމަށާއި މެސެޖަށް ޖަވާބު ނުދޭކަމަށް ބުނެ އުޝާމް ޝަކުވާ ކުރައްވައިފިއެވެ.
ރޭގެ ބައްދަލުވުމަށް މެމްބަރު އުޝާމް ވަޑައިގެން، ސިޓީ ކައުންސިލުން ގުޅުން ނުބާއްވާ ކަމަށާއި ސިޓީ ކައުންސިލުގެ މެމްބަރުން ވާހަކަ ވެސް ނުދެއްކި ކަމަށް ވިދާޅުވިއެވެ. އުޝާމް ވިދާޅުވީ ބައްދަލުވުމަށް އައުމުގެ ކުރިން ވެސް އަދި ބައްދަލުވުމަށް އައިސް ވެސް މޭޔަރު މުއިއްޒުއާ ވާހަކަ ދައްކަން މަސައްކަތް ކުރި ނަމަވެސް ކާމިޔާބު ނުވި ކަމަށެވެ.
"މިބައްދަލުވުމަށް އައުމުގެ ކުރިން ބައްދަލު ވުމާ ބެހޭ ގޮތުން މަޝްވަރާ ކުރުމަށް މޭޔަރ މުއިއްޒުއަށް އަޅުގަނޑު މެސެޖެއް ކުރިން. މެސެޖު ކިޔުމަށް ފަހު ރިޕްލައިއެއް ނުކުރައްވާ. މިތަނަށް އައިސް މޭޔަރ މުއިއްޒުއާ ވާހަކަ ދައްކަން މަސައްކަތް ކުރިން، ކާމިޔާބެއް ނުވި. މި ތަނުން ދޮރުން ވަންނަމުން މިތާ ތިން ކައުންސިލަރުން ތިބި، އެބޭފުޅުންނާ އަޅުގަނޑު ވާހަކަ ދެއްކިން ، ހުރި ކަމަށް ވެސް ނުހެދި އަނގައިން ވެސް ނުބުނި" އުޝާމް ވިދާޅުވިއެވެ.
އުޝާމް ވިދާޅުވީ ފިކުރު ތަފާތު ވިޔަސް އެއްބަޔަކު އަނެއް ބަޔަކަށް އިހްތިރާމް ކުރަންވާނެ ކަމަށެވެ. އަދި އެ އުސޫލު ކައުންސިލްގެ ބޭފުޅުންގެ ކިބައިގައި ހުންނާނެކަމަށް އުއްމީދު ކުރައްވާ ކަމަށް ވިދާޅުވިއެވެ.
އުޝާމްގެ މިވާހަކަތަކަށް ރައްދު ދެއްވައި ވާހަކަ ދައްކަވަމުން މޭޔަރ މުއިއްޒު ވިދާޅުވީ ވިލިމާލޭ ތަރައްގީއާއި ގުޅޭ ކަމަކަށް އުޝާމް ވާހަކަ ދެއްކެވީ ހަމައެކަނި ފެރީ އޭސީ ކުރުމަށް ޓަކައި ކައުންސިލަރ ނަހުލާ ހުށައަޅުއްވާ ކަމެއްގައި ކަމަށެވެ. އެހެން ނަމަވެސް ބައްދަލުވުމާ ގުޅޭ ގޮތުން މެސެޖު ކުރައްވައިފައިވާ ކަމަށާއި ޖަވާބު ނުދެވުނީ އިިހްމާލުން ކަމަށްވާ ނަމަ މާފަށް އެދޭ ކަމަށް މުޢިއްޒު ވިދާޅުވިއެވެ.
Ads by STO
