ކާށިދޫގެ ހާލަތު ރަނގަޅުވެ، ބައެއް ފިޔަވަޅުތަކަށް ލުއި ދީފި
ރޯގާގެ އަލާމާތްތަކެއް ހުރެގެން ފުލޫ ކުލިނިކަށް ދެއްކި ދެ މީހަކު ކޮވިޑް-19އަށް ފައްސިވެ ޖުލައިމަހުގެ 13 ވަނަ ދުވަހު މޮނިޓަރިންއަށްލި މާލެ އަތޮޅު ކާށިދޫގެ ހާލަތު މަޑުމަޑުން ރަނގަޅުވެ ބައެއް ފިޔަވަޅުތަކަށް ލުއި ދީފިއެވެ.
“ދެން”އަށް މައުލޫމާތު ދެއްވަމުން ކާށިދޫ ކައުންސިލްގެ ރައީސް މުހައްމަދު އާމިރު ވިދާޅުވީ މިވަގުތު ކާށިދޫގައި ބަލި ޖެހިފައި ތިބި 87 މީހުން އެބަތިބި ކަމަށާއި ރަށުގެ ހާލަތު މަޑުމަޑުން ރަނގަޅުވާތީ ބައެއް ފިޔަވަޅުތަކަށް ލުއި ދީފައިވާކަމަށެވެ.
“ރަށުގެ ހާލަތު މިވަގުތު ރަނގަޅު. އެހެންވެ ބައެއް ފިޔަވަޅުތަކަށް ލުއި ދީފައި މިހާރު ވަނީ. ކުރިން ޒަރޫރީ ބޭނުމެއްގައި ނޫނީ ތުނޑީ މަގުތަކަށް ނުދެވޭ ގޮތަށް އޮތް އޮތުން މިހާރު ވާނީ ނިމުމަކަށް ގެނެސްފައި. އަދި މިހާރު މިވަނީ ޖަމާއަތުގައި ނަމާދު ކުރަން ފަށައިފައި ގައި ދުރުކޮށް. ކުރިން ވަނީ ހުއްޓައިލައިފަ” އާމިރު ވިދާޅުވިއެވެ.
އާމިރު ވިދާޅުވީ ކާށިދޫގައި މިވަގުތު ބަލި ޖެހިފައި ތިބި 87 މީހުން އެބަތިބި ކަމަށާއި އެ ރަށުން މިހާތަނަށް 239 މީހަކަށް ބަލިޖެހިފައިވާކަމަށެވެ. ކާށިދޫއިން ކޮވިޑް-19ގެ ވޭދަނަތައް ފެނި މީގެ ކުރިން ވެސް އެ ރަށް ވަނީ މޮނިޓަރިންއަށް ލައިފައެވެ.
