ރާއްޖެ މިހާރު މި ވަނީ އާންމު ހާލަތަށް އާދެވިފައި: ރައީސް
އޮފީސްތަކާއި ވިޔަފާރިތައް ހުޅުވައިލެވި، ސްކޫލް މަދަރުސާތަކުގެ ކިޔެވުން ޢާންމު އުޞޫލުން މިއަދު ފެށުމާއި ގުޅިގެން ރާއްޖެއަށް މިހާރު މިވަނީ އައު ޢާންމު ޙާލަތަށް އާދެވިފައިކަމަށާއި، ނަމަވެސް ކޮވިޑް-19ގެ ނުރައްކާތެރިކަން މުޅިން ފިލައިގެން ދިޔައީ ކަމަށް ޤަބޫލު ނުކޮށް، ކޮވިޑް ޖައްސާ ވައިރަހުގެ ނުރައްކާތެރި ބާވަތްތައް އަދިވެސް ރާއްޖެއަށް އަތުވެދާނެ ކަމަށް، އަބަދުވެސް ސަމާލުވާން ޖެހޭނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވެފައި ވަނީ ދިރާސީ އައު އަހަރު ފެށުމުގެ ގޮތުން ރެހެންދި ސްކޫލްގައި ބޭއްވެވި ޚާއްޞަ އެސެމްބްލީގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާގެ ވާހަކަފުޅުގައި، ކޮވިޑް-19ގެ ދަތި އުނދަގޫތަކުގެ ތެރޭގައި ވެސް، ދިރާސީ އައު އަހަރަކާ ބައްދަލުކުރާއިރު، މިއަދު ގަދައަޅައި މަސައްކަތް ކުރަންވީ، ކޮވިޑް ކޮންޓްރޯލް ކުރުމުގައި މިލިބުނު ކުރިއެރުން އެ ގޮތުގައި ދަމަހައްޓައި، ސްކޫލްތަކުގެ ކިޔެވުން ކުރިއަށް ގެންދިޔުމުގައި ކޮވިޑުން ރައްކާތެރިވުމުގެ ފިޔަވަޅުތަކަށް، ޓީޗަރުންނާއި ދަރިވަރުންނާއި ބެލެނިވެރިން ވެސް ފުރިހަމައަށް ޢަމަލުކުރެއްވުން ކަމުގައި ވިދާޅުވިއެވެ.
އެމަނިކުފާނު ވިދާޅުވިގޮތުގައި، މިދިޔަ ދިރާސީ އަހަރުގެ ވަރަށް ގިނަ ދުވަސްތަކެއްގައި، ދަރިވަރުން ތިބެން ޖެހުނީ ސްކޫލަށް ދާނެ ފުރުޞަތެއް ނުލިބި، ވަރަށް ބޮޑު ނުތަނަވަސްކަމެއްގައި ކަމަށާއި، އެހެންކަމުން މިއަދު މި ލިބުނު ފުރުޞަތުގެ ބޭނުން ހިފައި، ހުރިހާ ދަރިވަރުން ވެސް ދިރާސީ އައު އަހަރުގެ ކިޔެވުން ކުރިއަށް ގެންދަންވީ އުފާވެރިކަމާއި ހިތްހަމަޖެހުމާ އެކުގައި ކަމުގައި ވިދާޅުވިއެވެ. އަދި، ރައްކާތެރިކަމުގެ ފިޔަވަޅުތަކާ އެކު މި ފެށުނު ދިރާސީ އަހަރަކީ، ދަރިވަރުންގެ ނަފްސާނީ އަދި ޖިސްމާނީ ދުޅަހެޔޮކަމަށް، ހެޔޮ ބަދަލުތަކެއް އަންނާނެ އަހަރެއްކަމަށް އެ މަނިކުފާނު އުންމީދު ކުރައްވާ ކަމުގައި ވެސް ވިދާޅުވިއެވެ.
މިގެ އިތުރުން ހުރިހާ ކުދިން ވެސް ކުރިމަތިވާ އުނދަގޫތައް ގިރާކޮށްގެން ވެސް، ތަޢުލީމު ހޯދައި، ޤައުމަށް ޚިދުމަތްކުރާ، ބޭނުންތެރި، މައިންބަފައިންނާއި ޢާއިލާ ފަޚުރުވެރިވާ، މުޖްތަމަޢަށް އުފާވެރިކަމާއި ހަމަޖެހުން ގެނެސްދޭނެ ކުއްޖަކަށްވުމަށް އަޒުމް ކަނޑައެޅުމަށް ރައީސް އެދިވަޑައިގެންނެވިއެވެ.
