ރަނގަޅު ދަރިންތަކެއް އުފެއްދުމަކީ މުޅި މުޖްތަމަޢުގެ ޒިންމާއެއް: ނައިބު ރައީސް
ރަނގަޅު ދަރިންތަކެއް އުފެއްދުމަކީ މުޅި މުޖްތަމަޢުގެ ޒިންމާއެއްކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމު ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ ދިރާސީ އައު އަހަރު ފެށުން ފާހަގަކުރުމުގެ ގޮތުން ކަލާފާނު ސްކޫލުގައި މިއަދު މެންދުރުފަހު ބޭއްވި ޚާއްޞަ އެސެމްބްލީ ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
މި ރަސްމިއްޔާތުގެ ތެރެއިން ނައިބު ރައީސް ވަނީ އެ ސްކޫލުގައި ޚާއްޞަ އެހީއަށް ބޭނުންކުދިންނަށް ޚާއްޞަކޮށް ބެހެއްޓި ލިފްޓު އިފްތިތާޙް ކޮށްދެއްވާފައެވެ. މިއީ ސަރުކާރުން އިންކްލޫސިވް އެޑިއުކޭޝަން ރާއްޖޭގައި ފުޅާކުރުމަށް ކުރަމުންގެންދާ މަސައްކަތުގެ ދަށުން ކުރެވުނު މަސައްކަތެކެވެ.
ނައިބު ރައީސްގެ ވާހަކަފުޅުގައި، ޤައުމަށް ފައިދާހުރި މަސައްކަތްތެރި ކާމިޔާބު ދަރިވަރުންތަކެއް އުފެއްދުމުގައި މުޅި މުޖުތަމައުގެ ޒިންމާ ފާހަގަކުރައްވައި، ސްކޫލު ނިންމާ ކުދިންނަކީ ދިރިއުޅުމަށް ތައްޔާރުވެފައިވާ ދަރިވަރުންތަކެއްގެ ގޮތުގައި ބައްޓަންކުރުމަށް ޚާއްޞަކޮށް ބެލެނިވެރިންނާއި ޓީޗަރުން ކެނޑިނޭޅި މަސައްކަތް ކޮށްދެއްވުމަށް ވެސް އެދިވަޑައިގެންނެވިއެވެ.
އަދި މުޅި ދުނިޔަށް ކުރިމަތިވި ކޮވިޑް-19 ޕެންޑަމިކްގެ ދަތި ހާލަތުގެ ސަބަބުން އެންމެބޮޑު ގެއްލުމާ ކުރިމަތިލާން ޖެހުނީ ތަޢުލީމީ ދާއިރާއަށްކަން ފާހަގަކުރައްވައި، އެ ދަތި ހާލަތުގައި ވެސް ޚާއްޞަކޮށް ޓީޗަރުންނާއި ތަޢުލީމީ ދާއިރާގެ ހިންގުންތެރިން، ދަރިވަރުންނާ ހަމައަށް ފިލާވަޅުތައް ފޯރުކޮށްދިނުމަށް ކުރެއްވި ބުރަ މަސައްކަތްތަކަކީ މުޅި މި ސަރަހައްދުގައި ވެސް ފާހަގަކޮށްލެވޭ ޚާއްޞަ މަސައްކަތްތަކެއްކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
ހަމަ އެހެންމެ މިހާރު ޢާންމު ހާލަތާއި އެގޮތަށް ހުރިހާ ކަމަކަށް ފުރުޞަތުތައް ފަހިވަމުންދާއިރު މި ފުރުޞަތުގެ ބޭނުން ފުރިހަމަ ގޮތުގައި ހިފައި، ފާއިތުވެ ދިޔަތަން އަލުން ހޯދުމަށްވެސް އަޒުމު ކަނޑައަޅައިގެން މަސައްކަތްކުރުމަށް ރައީސުލްޖުމްހޫރިއްޔާގެ ނައިބު ދަރިވަރުންގެ ކިބައިން އެދިވަޑައިގެންނެވިއެވެ.
ނައިބު ރައީސް ގެ ވާހަކަފުޅުގައި ތަޢުލީމީ ދާއިރާއަށް ހެޔޮބަދަލުތައް ގެނައުމަށް ސަރުކާރުން ކުރައްވާ މަސައްކަތްތަކުގެ މައްޗަށް ވެސް އަލިއަޅުވައިލެއްވިއެވެ. އެގޮތުން އެއްވެސް ކުއްޖަކު ބާކީ ނުކޮށް، އިންކްލޫސިވް އެޑިއުކޭޝަން ރާއްޖޭގައި ފުޅާކުރުމަށް ކުރާ މަސައްކަތްތަކާއި ތަޢުލީމީ ދާއިރާގެ މީހުންގެ މުސާރައާ އިނާޔަތްތަކަށް ހެޔޮ ބަދަލުތަކެއް ގެނައުމަށް ސަރުކާރުން ކުރާ މަސައްކަތް އެމަނިކުފާނު ފާހަގަކުރެއްވިއެވެ.
ދިރާސީ އައު އަހަރުގެ ކިޔެވުން މިއަދު ފަށައިފައި ވަނީ ސަރުކާރު ސްކޫލްތަކާއި އަމިއްލަ ސްކޫލް މަދަރުސާތަކުގެ ޖުމްލަ 92,936 ދަރިވަރުންނާ އެކުގައެވެ.
